Google permitirá aos usuarios de Huawei os servizos de Google Play así como as proteccións Google Play Protect nos dispositivos xa existentes da marca, pero non actualizar os seus sistemas operativos Android, informaron a EFE fontes da compañía estadounidense.
A única forma que terán os usuarios de Huawei de acceder ás actualizacións de Android será a través das que estean dispoñibles mediante un código aberto, o que habitualmente tarda meses, segundo as fontes.
O sistema operativo Android incorpora nas súas actualizacións melloras de seguridade, de almacenamento ou de optimización de batería.
Android asegurou, a través de Twitter, aos usuarios que lle preguntaban pola rede social que os servizos Google Play e Gloogle Play Protect manteríanse en funcionamento para os dispositivos de Huawei e que esta medida estaba encamiñada a cumprir coas medidas postas en marcha do Goberno de EE UU, sen ofrecer máis detalles.
Pola súa banda, Huawei ofrecerá actualizacións de seguridade a todos os seus equipos, segundo anunciou a compañía logo de saberse que Google deixará de venderlle compoñentes e software.
"Huawei fixo contribucións substanciais ao desenvolvemento e crecemento de Android. Como un dos seus socios crave mundiais, traballamos estreitamente coa súa plataforma de código aberto para desenvolver un ecosistema que beneficiou tanto aos usuarios como ao sector", contestou a compañía tras a decisión estadounidense de limitar o seu aprovisionamento e viabilidade.
A tecnolóxica chinesa prometeu que continuará facilitando actualizacións e servizos posventa a todos os seus equipos, tanto "aos que xa se venderon como aos que están aínda en almacenamento" e que seguirá construíndo un "ecosistema de software seguro e sostible" para todos os seus usuarios.
