martes. 12.11.2019 |
El tiempo
martes. 12.11.2019
El tiempo

A gota fría deixa cinco mortos e 3.500 evacuados

Axentes exercen labores de rescate nun dos múltiples municipios alicantinos afectados.MORELL (Efe)
Axentes exercen labores de rescate nun dos múltiples municipios alicantinos afectados.MORELL (Efe)
Catro dos falecidos foron arrastrados pola riada nos seus coches, mentres ao quinto viuse sorprendido polo desbordamento do Segura

As choivas torrenciais que desde o xoves azoutan o sueste español cobráronse xa cinco vítimas mortais e provocaron a evacuación de polo menos 3.500 persoas, o desbordamento do río Segura en varios puntos e graves desfeitas e danos económicos aínda por avaliar.

Ao longo do día o temporal obrigou a cortar máis de oitenta estradas, once delas da rede principal. ás 19.00 horas permanecía cortada a AP7 en Pilar de la Horadada (Alacante) e a N-301 en Cieza e Molina de Segura (Murcia).

O tráfico ferroviario viuse alterado e incluso interrompido en diferentes tramos da rede de Murcia e da Comunidade Valenciana, e varios portos da rexión víronse tamén afectados. O aeroporto de Murcia permaneceu pechado este venres, mentres que o de Almería foi reaberto tras cinco horas coas operacións suspendidas. 

Con precipitacións que superaron os 400 litros por metro cadrado en 48 horas en localidades como Orihuela (Alacante), as riadas cubriron amplas zonas das provincias de Murcia, Alacante, Valencia e Almería, onde se sucederon rescates e desaloxos.

Espérase que en todo o arco mediterráneo as choivas torrenciais comecen a remitir, e a Axencia Estatal de Meteoroloxía (Aemet) prevé que a DANA (depresión illada en niveis altos) perda fol a partir do sábado no seu lento movemento cara ao norte, aínda que as tormentas estenderanse o fin de semana a gran parte do país e especialmente á zona centro.

Na Comunidade Valenciana esperábanse precipitacións similares no sur de Castelló, única zona na que se mantén a alerta laranxa, e duns 20 litros por hora en boa parte da rexión. Tamén se activou o nivel laranxa en Eivissa e Formentera.

As consecuencias máis graves da gota fría son o falecemento de catro persoas atrapadas nos seus coches

Tras a morte do xoves de dous irmáns en Caudete (Albacete) cando o vehículo no que viaxaban foi arrastrado por unha riada, na mañá deste venres rescatouse o cadáver dun home que perdeu a vida nun paso subterráneo alagado pola choiva na capital almeriense.

A cuarta vítima mortal rexistrouse nunha rambla de Baza (Granada): un home de 36 anos residente en La Jámula cuxa familia denunciara pola mañá a súa desaparición ante a Policía Nacional. O seu corpo foi achado por un helicóptero nun lugar de difícil acceso e moi afastado do lugar onde previamente se atopou o seu vehículo.

A última hora deste venres, a Garda Civil achou o cadáver dun home de 58 anos nunha zona de Orihuela alagada polo desbordamento do río Segura. Segundo os primeiros indicios, puido ser arrastrado por unha avenida de auga cando acababa de aparcar o seu coche e intentaba cruzar a rúa.

Aos familiares das vítimas e aos centos de miles de afectados transmitiron a súa solidariedade en nome do Goberno a portavoz do Executivo en funcións, Isabel Celaá, e o ministro do Interior, Fernando Grande-Marlaska, que se desprazou pola tarde a Orihuela para coñecer de primeira man a situación.

O ministro pediu que se reduzan ao máximo posible os desprazamentos e, sobre todo, fixo un chamamento á poboación para mantéñase informada as previsións meteorolóxicas e atenda as recomendacións das autoridades. 

O principal consello de Protección Civil é non coller o coche e, se unha riada sorprende ao condutor, saír do vehículo, se é necesario baixando os portelos e subíndose ao teito.

Marlaska lanzou unha mensaxe de tranquilidade á poboación antes de reiterar que España conta cun sistema "ben preparado para atender urxencias". Así, despregáronse un total de 1.158 efectivos das Forzas Armadas, catro helicópteros e 300 vehículos tácticos en Orihuela e Murcia para apoiar os labores de procura e rescate.

A gota fría deixa cinco mortos e 3.500 evacuados
Comentarios