domingo. 09.08.2020 |
El tiempo
domingo. 09.08.2020
El tiempo

Liberan 20 persoas que vivían amontoadas e con coaccións nun restaurante de Madrid

O restaurante no que estaban confinadas 20 persoas. POLICÍA
O restaurante no que estaban confinadas 20 persoas. POLICÍA
Tiñan que abonar 400 euros ao mes e se non podían afrontar o pago a dona obrigábaos a estar en espazos aínda máis reducidos, como aseos, e ameazábaos con contaxiarlles o coronavirus

A Policía Nacional liberou 20 persoas de diversas nacionalidades que vivían confinadas en condicións infrahumanas nuns pequenos espazos dun restaurante do madrileño distrito de San Blas. Atendendo á información divulgada este venres pola Policía, pagaban por iso 400 euros.

Cando non podían facer fronte ao pago esixido eran sometidos a coaccións, obrigándoos a durmir en espazos aínda máis reducidos e incluso os ameazaban con contaxiarlles o coronavirus.

Foron detidas dúas persoas, a propietaria do restaurante e o dono do inmoble, aos que se lles imputan delitos de favorecimiento da inmigración irregular, coaccións e delito contra a saúde pública.

A investigación iniciouse cando os axentes detectaron que no interior dun restaurante, que cesara a súa actividade comercial, poderían estar aloxadas varías persoas sen fogar en condicións de amontoamento e insalubridade. Por ese motivo os investigadores prepararon un dispositivo para realizar unha inspección no establecemento e atoparon nel 20 persoas de distintas nacionalidades (España, Bangladesh, Colombia, Filipinas, Honduras, Perú, Portugal e Venezuela), entre as que se atopaban dous bebés de menos dun ano.

Foron detidas a dona do negocio e o propietario do inmoble

Os investigadores detectaron que as vítimas vivían no interior do establecemento en condicións insalubres, amontoadas en espazos moi reducidos e non aptos para a habitabilidade. Os responsables instalaran colchóns na barra do bar, na cociña baixo a campá extractora ou no patio traseiro, separando cada "estancia" por cartóns ou plásticos.

As investigacións permitiron saber que a propietaria do negocio, unha vez cesara a actividade comercial, arrendou pequenos espazos a persoas con dificultades económicas por 400 euros ao mes. Tamén detectaron que no caso de que algunha das vítimas non puidese efectuar o pago do aluguer impedíalles o acceso ás subministracións básicas e trasladábaas a espazos aínda máis reducidos como pequenos aseos ou incluso a unha cámara frigorífica.

Ademais, para amedrentar aínda máis ás vítimas, manifestaba ser portadora do Covid-19 e tusía e esbirraba sobre os pratos e outros obxectos cando se atopaban na hora da comida. 

As xestións posteriores permitiron detectar que o propietario do inmoble era coñecedor das prácticas da arrestada, polo que tamén foi detido como presunto autor dun delito de favorecemento da inmigración irregular.

As investigacións continúan abertas, xa que a Policía non descarta a existencia doutras persoas implicadas, xa que algunha das vítimas estaba empadroada no negocio de hostalería.

Liberan 20 persoas que vivían amontoadas e con coaccións nun...
Comentarios