O secretario xeral de Podemos e vicepresidente segundo, Pablo Iglesias, pediu este martes "desculpas avergoñadas" ás vítimas do expolicía franquista Antonio González Pacheco, alias Billy o Neno, por rexeitar no Congreso unha petición para que o Goberno facilite á oposición a folla de servizos do policía xubilado, coñecido polas súas torturas durante o franquismo.
Trátase dunha petición de Bildu que foi rexeitada hai unha semana pola Mesa do Congreso seguindo o criterio dos letrados en contra de que se pidan datos persoais protexidos pola lei. Unidas Podemos expresou as súas dúbidas xurídicas, pero aceptou o criterio da maioría. A formación abertzale recorreu esa decisión da Mesa e o seu escrito viuse este martes na Xunta de Portavoces, onde o PP, o PSOE, Ciudadanos, Unidas Podemos e Vox rexeitaron que se deba reconsiderar ese veto.
"Hoxe equivocámonos na Xunta de Portavoces e non hai escusa que valla. As vítimas do torturador Pacheco non merecen vernos fallar. As boas intencións non xustifican erros como este. Por sorte podemos rectificar. As miñas desculpas avergoñadas ás vítimas", sentenciou Iglesias nunha mensaxe que difundiu en Twitter, recollido por Europa Press.
Na mesma liña, Podemos expresou noutra mensaxe nesta rede social as súas desculpas, en especial "ás vítimas dun torturador sen escrúpulos", polo "grave" erro cometido. "Por sorte, o erro ten arranxo; pero hoxe sentimos vergoña", engadiron.
"DUBIDAS XURÍDICAS"
En declaracións aos medios de comunicación nos corredores do Congreso, o portavoz de Unidas Podemos no Congreso, Pablo Echenique, explicou o motivo do erro, que se debeu, segundo relatou, ás "dúbidas xurídicas" que existían ao redor da petición realizada por Bildu.
Segundo explicou o portavoz parlamentario, Unidas Podemos decidiu por prudencia "decantarse" pola opinión dos letrados da Cámara, que aconsellaban votar en contra da petición, argumentando que non é legal que o Goberno faga pública a folla de servizos do 'Billy o Neno'.
Pouco despois, e tras as duras críticas recibidas por ERC, Bildu, Más País e BNG, Echenique recoñeceu que cometeran un "erro" e anunciou que cando o tema volva á Mesa, votarán a favor de que se coñeza ese documento. Iso si, PSOE, PP e Vox seguirán sumando maioría na Mesa do Congreso para tombar a iniciativa.
En todo caso, o portavoz quixo deixar claro que as propostas da súa formación para acabar coa impunidade neste sentido van moito máis alá, pois Unidas Podemos defende que o policía xubilado debe ser xulgado e ir o cárcere polos seus crimes contra os dereitos humanos, e debe ser desposuído de todas as súas medallas ao mérito.
IGLESIAS, ENVORCADO COAS VÍCTIMAS DO FRANQUISMO
A reparación das vítimas da Guerra Civil e a Ditadura é unha das principais preocupacións de Podemos e Iglesias situou este asunto como prioridade nesta lexislatura, chegando a asegurar que "é un deber patriótico defender aos heroes que se xogaron a vida e a liberdade pola xustiza social e por traernos a democracia".
Así o asegurou o pasado venres durante o acto de homenaxe polo centenario do nacemento do poeta comunista e preso político durante a ditadura franquista Marcos Ana. De feito, a súa primeira aparición pública como vicepresidente do Goberno foi na homenaxe ás vítimas da Semana Negra de Madrid de 1977.
