Podemos propón que non exista delito de sedición se non se usan armas

A reforma do Código Penal suporía a liberación dos nove líderes do procés presos
El presidente del grupo parlamentario de Unidas Podemos, Jaume Asens. EUROPA PRESS
photo_camera O presidente do grupo parlamentario de Unidas Podemos, Jaume Asens. EUROPA PRESS

Unidas Podemos enviou ao Ministerio de Xustiza o borrador dun proxecto de lei de reforma do Código Penal para que non exista delito de sedición se non se empregan armas.

Así o adiantou El País, que especifica que, se a proposta sae adiante, os nove líderes do procés, actualmente en prisión por este delito, sairían do cárcere.

Pola súa banda, o ministro de Xustiza, Juan Carlos Campo, admitiu nunha entrevista a este medio publicada o luns que a intención do Goberno é adaptar o delito de sedición aos tempos actuais, xa que o considera "anacrónico".

LÍDERES DO PROCÉS EN CAMPAÑA. Ademais, Podemos insistiu este mércores na súa idea de que os políticos presos polo procés salgan canto antes do cárcere e poidan facer campaña nas eleccións catalás "por saúde democrática", unha cuestión sobre a que admite que hai posicións distintas no seo do Goberno.

Nunha entrevista en RNE, o portavoz de Unidas Podemos no Congreso, Pablo Echenique, recoñeceu que o PSOE ten "puntos de vista distintos" sobre os indultos pero considerou que se trata de diferenzas "normais" nun Goberno de coalición.

"Levamos dicindo que os líderes cataláns non terían que estar no cárcere desde hai moitísimo tempo", remarcou Echenique un día despois de que o presidente do grupo parlamentario de Unidas Podemos, Jaume Asens, apremase ao ministro Campo a reformar o Código Penal.

INDULTOS. Engadiu Asens que se devandita reforma non chegaba a tempo, o Goberno debería indultar antes das eleccións catalás aos líderes independentistas condenados por sedición con penas de ata 13 anos de cárcere.

"Non se entende a demora" do informe do Supremo, dixo Asens, que cre que "hai motivos dabondo para conceder estes indultos", porque a sentenza foi "absolutamente desproporcionada".

Echenique restou importancia ás friccións e considerounas "un debate máis", que espera que desemboque en que os políticos cataláns poidan facer campaña.

Pola súa banda, o portavoz de ERC no Congreso dos Deputados, Gabriel Rufián, reclamou este mércores que o Goberno atalle "a anomalía" de que os condenados do procés estean no cárcere antes das eleccións catalás e dea mostras de que a política "serve de algo".

Comentarios