O Supremo confirma a condena de 23 anos ao asasino da peregrina americana

A muller foi asasinada en abril de 2015 nas inmediacións de Astorga

Miguel Ángel Muñoz Blas. EP
photo_camera Miguel Ángel Muñoz Blas. EP

O Tribunal Supremo (TS) confirmou a condena de 23 anos de prisión imposta a Miguel Ángel Muñoz Blas por asasinar o 5 de abril de 2015 á peregrina estadounidense Denise Pikka Thiem nas inmediacións de Astorga (León).

A Sala II do alto tribunal desestimou o recurso de casación presentado polo acusado contra a sentenza do Tribunal Superior de Xustiza de Castela e León, que á súa vez ratificou o fallo ditado por un tribunal do xurado da Audiencia Provincial de León.

Miguel Ángel Muñoz Blas, de 42 anos, foi condenado a vinte anos polo delito de asasinato e a tres polo de roubo con violencia, xa que tras asasinar á peregrina a golpes apropiouse das súas pertenzas, entre elas 1.132 dólares.