El tiempo
viernes. 02.12.2022
El tiempo

No Camiño da accesibilidade

Integrantes da Fundación Menela retomaron onte o Camiño Portugués pola Costa desde Pontevedra. GONZALO GARCÍA
Integrantes da Fundación Menela retomaron onte o Camiño Portugués pola Costa desde Pontevedra. GONZALO GARCÍA
Integrantes da Fundación Menela de axuda ás persoas con autismo partiron da Peregrina polo Camiño Portugués da Costa a fin de reivindicar que a ruta Xacobea sexa tamén accesible a nivel cognitivo e completar as etapas ata Compostela

Durmir nun albergue en liteiras, coñecer peregrinos de todos os países de Europa ou compartir parte do Camiño con rapaces e rapazas de colexios da contorna é o que máis lle gusta da ruta Xacobea a Adrián Márquez. 

Este xoven é un dos integrantes da Fundación Menela (Rede de Servizos para o autismo e a dependencia), que vén de retomar a ruta a Compostela desde a Praza da Peregrina de Pontevedra. A actividade enmárcase no proxecto ‘Xacobeo Autismo. Un Camiño de todos’, que levaron a cabo de xeito intermitente pola pandemia. Agora reactívana para facer as últimas etapas. "Un dos nosos obxectivos é mellorar a accesibilidade cognitiva dos espazos polos que transita o Camiño Portugués da Costa para facilitar a experiencia ás persoas que, coma nós, teñen dificultades de comunicación", tomou a palabra Adrián.

Membros da Fundación Menela leron unha mensaxe pola accesibilidade na Praza da Peregrina de Pontevedra. GONZALO GARCÍA
Membros da Fundación Menela leron unha mensaxe pola accesibilidade na Praza da Peregrina de Pontevedra. GONZALO GARCÍA

Pola súa banda, o presidente da Fundación Menela, Cipriano Jiménez, destacou a importancia desta andaina na que interveñen vinte persoas adultas con autismo acompañadas de profesionais especializados e familiares. "O Camiño é algo que todo o mundo recorda sempre", subliñou. "Para nós supón coñecer lugares que un non imaxinaba, o recibimento que nos fan... Estes rapaces víveno dunha maneira extraordinaria, moito máis intensamente que calquera persoa", sinalou.

Un dos nosos obxectivos é mellorar a accesibilidade cognitiva dos espazos polos que transita o Camiño Portugués da Costa

Canda os peregrinos atopábase este luns un grupo de dez estudantes do Ciclo de Integración Social do CIFP A Xunqueira que acompañou aos camiñantes no primeiro tramo, ata Barro. "É unha experiencia moi enriquecedora para o noso alumnado", manifestou o director do centro de Formación Profesional, Santiago Ferrero. "Había dez prazas e desbordouse a demanda, están encantados de participar", engadiu a titora dos voluntarios, Irene Sánchez.

CIDADE ACCESIBLE. Tamén o alcalde de Pontevedra, Miguel Anxo Fernández Lores, quixo dar a benvida á expedición á "capital do Camiño Portugués", unha cidade, subliñou o rexedor, "accesible, feita para as persoas". Lores comprometeuse a seguir traballando desde o Concello a fin de que a Boa Vila sexa tamén unha "cidade cada vez máis accesible para as persoas que teñen algún tipo de problema cognitivo". O alcalde emprazou á Fundación Menela a que no vindeiro ano Xacobeo "que será o 2027" volvan para comprobar todos os avances en materia de accesibilidade.

A aventura xacobea destes peregrinos prolongarase durante catro días. Polo camiño, a Fundación Menela convidará a centros educativos, colectivos sociais e concellos a acompañalos polas diferentes etapas ata o 23 de setembro, data na que está previsto que este grupo de peregrinos chegue ata a Praza do Obradoiro.

No Camiño da accesibilidade
Comentarios