¿Por que odia o ser humano? ¿É o odio unha pulsión que o home pode conter? A serie Why We Hate, producida por Steven Spielberg, intentará responder a estas preguntas e explorará unha das emocións máis destrutivas da humanidade cun formato que combina ciencia e xornalismo.
Why We Hate, que verá a luz o 13 de outubro en Discovery a nivel mundial, traza a base evolutiva do odio e o seu impacto nas sociedades humanas ao longo da Historia. Así, episodios como o Holocausto ou o xenocidio de Ruanda tratarán de ser explicados nos seus seis capítulos de duración a través da investigación xornalística e mediante unha análise científica que recorre a ramas como a psicoloxía, a bioloxía ou a neurociencia.
A serie aborda momentos históricos concretos nos que o ser humano deixouse levar polo odio para desatar grandes conflitos internacionais, pero tamén trata de contextualizar os casos nos que ese sentimento está presente no cotiá: a rivalidade nos eventos deportivos, a retórica violenta das redes sociais ou a crispación derivada das discusións políticas sobre aspectos como a raza, a relixión ou as crenzas sociais.
Why We Hate preséntase o 13 de outubro en Discovery Channel
A primeira entrega da serie en España será emitida en Discovery Channel o domingo 13 de outubro. Continuará a súa emisión os cinco domingos posteriores e cada capítulo contará coa visión de expertos que desenvolverán como o pensamento grupal dá forma ás percepcións e comportamentos das persoas.
En Why We Hate, que está dirixida por Geeta Gandhbir e Sam Pollard (gañadores dun Emmy por When The Leeves Broke: A Requiem in Four Acts), a científica cognitiva Laurie Santos, o antropólogo evolutivo Brian Hare ou a xornalista Jelani Cobb reparan en conceptos como o de identidade "rexional" para explicar, por exemplo, por que o profundo amor a un equipo de fútbol pode levar a odiar aos seguidores do equipo rival.
A serie tamén se aproxima á historia de persoas que, empuxadas polas súas crenzas, acabaron no cárcere por delitos de odio e que finalmente lograron desvincularse desas ideoloxías.
Spielberg está acompañado na produción por Alex Gibney, gañador en 2008 do Óscar ao mellor documental por Taxi to the Dark Side, unha película que denunciaba as prácticas de torturas levadas a cabo por Estados Unidos en Afganistán, Iraq e Guantánamo.
"Esta non é unha serie que se limite a documentar algo que está a suceder; é unha investigación, un intento de entender por que odiamos, a través da ciencia e a través da comprensión da nosa condición humana", apuntaron os cineastas nun comunicado difundido por Discovery.
