O Espanyol oficializa o traspaso de Borja Iglesias ao Betis

▶  A venda do atacante galego é a máis elevada da historia do club catalán
Borja Iglesias, pousa como novo futbolista do Real Betis. REAL BETIS
photo_camera Borja Iglesias, pousa como novo futbolista do Real Betis. REAL BETIS

O Espanyol oficializou o mércores o traspaso do dianteiro Borja Iglesias ao Betis por un total de 28 millóns de euros, cantidade correspondente á cláusula de rescisión do futbolista.

Tal como informou a empresa propietaria do Espanyol, Rastar, aos seus accionistas, dos 28 millóns, 18 cobraranse agora, cinco en decembro e outros cinco en xuño do 2020. Esta operación converte a Borja Iglesias na venda máis elevada da historia do club.

As conversacións entre a entidade catalá e a andaluza iniciáronse hai varias semanas. A postura do Espanyol sempre foi inflexible ao pedir o pago da cláusula íntegra e así llo fixo saber en todo momento ao Betis.

A venda de Borja Iglesias é a máis elevada da historia do club catalán

Borja Iglesias chegou ao Espanyol a tempada pasada, procedente do Zaragoza, e o seu rendemento no seu primeiro ano na máxima categoría foi notable. O galego asinou na campaña 2019-20 un total de 20 goles entre LaLiga e a Copa do Rei.

Borja Iglesias: "A miña etapa no Espanyol regaloume momentos inesquecibles"
O dianteiro Borja Iglesias afirmou nunha carta publicada en redes sociais que a súa etapa no club branquiazul regaloulle "momentos inesquecibles, dun crecemento persoal e deportivo incalculable".

O futbolista mostrouse "moi agradecido" pola oportunidade que lle brindou a entidade catalá. O club apostou por el e abriulle as portas. O santiagués destacou "a confianza que o Espanyol" depositou nel "para cumprir o soño de xogar na elite".

Borja Iglesias despediuse dos compañeiros e dos traballadores do Espanyol. O ariete destacou o gran recibimento do grupo e o "afecto e amabilidade" que viviu na súa etapa como branquiazul. Ademais, confesou sentirse "afortunado" polo agarimo que lle brindaron os seguidores.

Antes de iniciar a súa nova etapa no Betis, Borja desexou unha gran tempada á afección perica. "Estou seguro de que ides gozar moito desta tempada e espero que sexa a continuación do apaixonante final que vivimos en maio", afirmou en referencia á celebración tras a clasificación europea.

Comentarios