jueves. 02.07.2020 |
El tiempo
jueves. 02.07.2020
El tiempo

0-0. A falta de precisión deixa a Dépor e Sporting sen triunfo

Un momento do encontro entre o Dépor e o Sporting. @RCDEPORTIVO
Un momento do encontro entre o Dépor e o Sporting. @RCDEPORTIVO

O Deportivo e o Sporting de Xixón volveron do parón polo coronavirus sen precisión, e iso impediulles desequilibrar un partido (0-0) no que os asturianos perdoaron máis que os coruñeses. 

Os deportivistas, que seguen en posicións de descenso e empatados co seu próximo rival, o Oviedo, non chegaron a rematar a porta en todo o partido, aínda que tiveron algunha ocasión clara para facelo. Os asturianos, grazas aos erros do seu rival, si comprometeron ao gardameta local, Dani Giménez, pero quedaron sen batelo. 

Notábase que os dous equipos tiñan fame de fútbol e o partido comezou cun ritmo de xogo alto, algo inesperado logo de tres meses sen fútbol. 

Na volta de LaLiga SmartBank, o Deportivo mantivo a aposta polo sistema de cinco defensas, aínda que con dous dianteiros, no debut de Abdoulaye Ba como titular tras chegar ao equipo coruñés días antes de que se decretase o estado de alarma polo coronavirus. 

Ao parón chegara o Sporting en forma, con tres vitorias en catro partidos, e en Riazor intentou prolongar a tendencia. O poste negoullo aos 23 minutos tras un erro de Ba e unha combinación de Álvaro Vázquez, Carmona e o brasileiro Murilo, quen superou a Dani Giménez, pero atopou a madeira. Foron momentos de dúbidas para o Deportivo, que segundos despois puido pagar outro erro defensivo, esta vez de Bóveda, que non rendibilizou Carmona. 

A 'nova normalidade' futbolística cambiou o ambiente caldeado dun Deportivo-Sporting, declarado de alto risco, pola calma absoluta nos arredores e a bancada de Riazor

Os locais, que finalizaron o primeiro tempo sen disparos entre os tres paus, volveron ao céspede con intensidade. En 35 segundos, Beauvue apoiouse en Çolak e este asistiu cun pase milimétrico a Bóveda, que meteu o exterior da bota de dereita sen a rosca suficiente como para comprometer a Mariño. 

Fernando Vázquez gastou aos 53 minutos tres dos cinco cambios, todos para refrescar o centro do campo e o ataque, e un dos recentemente ingresados ao céspede, Koné, púxolla franca a Sabin Merino, pero o dianteiro non estivo acertado pouco antes de que se cumprise a hora de xogo. 

No Sporting, o exxogador do Deportivo Miroslav Djukic esperou case un cuarto de hora máis para facer as dúas primeiras permutas e, en cuestión de segundos, volveu rozar o gol cun pase filtrado de Murilo a Manu García que salvou primeiro Dani Giménez e, en segundo termo, Peru Nolaskoain. 

O partido afrontou unha fase de ida e volta, co Sporting máis elevado, ata que se arrefriou coa última pausa de hidratación. Tras ela, o Deportivo, que esgotou os cambios cunha modificación en defensa, buscou o triunfo cun cabezazo do venezolano Christian Santos que se foi alto por centímetros aos 87 minutos. 

Os coruñeses non puideron sequera probar a Diego Mariño en todo o encontro e o Sporting, que só fixo tres cambios, perdooulles cando expiraba o tempo regulamentario cun remate de Cristian Salvador na área pequena. 

Ficha técnica
Deportivo: Dani Giménez; Bóveda, Abdoulaye Ba, Peru Nolaskoain, Montero (Mujaid, m.79), Salva Ruiz; Çolak (Keko, m.53), Vicente Gómez (Koné, m.53), Gaku Shibasaki; Beauvue (Uche Agbo, m.53) y Sabin Merino (Christian Santos, m.67). 
Real Sporting de Gijón: Mariño; Medina, Babin, Molinero, Cordero; Carmona, Salvador (Javi Fuego, m.90), Pedro Díaz (Nacho Méndez, m.67), Murilo; Manu García e Álvaro Vázquez (Djurdjevic, m.67). 
Árbitro: Ais Reig, do comité valenciano. Amoestou a Javi Montero (m.49), do Deportivo. 
Incidencias: Partido da trixésima segunda xornada de LaLiga SmartBank disputado no Estadio Abanca-Riazor a porta pechada. Gardouse un minuto de silencio polas vítimas do coronavirus.

0-0. A falta de precisión deixa a Dépor e Sporting sen triunfo
Comentarios