Soñaba con iso e xa o conseguiu. Roland Garros volverá reeditar o duelo entre o español Rafael Nadal e o suízo Roger Federer, unha das rivalidades máis intensas da historia do deporte.
Recén cumpridos os 33 anos, o español derrotou o xaponés Kei Nishikori por 6-1, 6-1 e 6-3. Aos 37, o helvético desfíxose do seu compatriota Stan Wawrinka por 7-6 (4), 4-6, 7-6 (5) e 6-4.
O venres vivirase un partido que París viu xa cinco veces, sempre con vitoria do español. Será a segunda vez que non se produza na final e será o décimo cuarto duelo entre ambos sobre terra batida, na que o suízo só conta con dous triunfos fronte ao español.
Vantaxe moral para Nadal, que, con todo, viu como os cinco últimos duelos caeron todos ao lado do helvético, ao que non gaña desde as semifinais do Aberto de Australia de 2014. Empate moral para o suízo.
Agárrase á superficie Nadal, ao desafío Federer. á emoción os espectadores, encantados. Será un duelo clásico pero vello. Non xogan sobre terra desde a final de Roma de 2013 e en Roland Garros non se cruzaron desde a final de 2011.
É o que ten ser tan incombustibles como estes dous tenistas que protagonizaron algunhas das páxinas máis gloriosas do deporte da raqueta.
Como cada duelo ten a súa particularidade, o do venres servirá para medir se a recuperación de Nadal é tan boa como foi mostrando no torneo que aspira a conquistar por duodécima vez.
Contra Nishikori deixou unha nova proba, unha das súas vitorias máis contundentes, pero lograda ante un tenista sen combustible, esgotado tras dous maratóns previos que aniquilaron as poucas opcións que tiña de entrada.
O español alcanzou as semifinais en sete dos oito torneos que disputou esta tempada. Serán as duodécimas en París e, sempre que as xogou, acabou levantando a copa.
Comparte tamén optimismo o suízo, que non comparecía desde hai tres anos en Roland Garros, templo da superficie que lle dá peores réditos. No seu regreso, Federer deixou notas positivas e só perdeu un set, contra un Wawrinka que no seu último duelo en París antes dese intervalo apeárao precisamente en cuartos de final.
Pode darse por satisfeito o suízo co seu regreso, que é xa fantástico pero que pode ser glorioso se o coroa cunha vitoria fronte a Nadal.
Federer convértese no primeiro tenista que suma 70 triunfos en cuartos de final dun Grand Slam. Xogará a súa oitava semifinal en Roland Garros e a cuadraxésima cuarta nun grande, unha marca.
Antes de que crucen as súas raquetas, comezaron xa o duelo verbal. Federer asegurou que se volveu xogar sobre terra é, en boa medida, para medirse a Rafa.
Rafa sinalou que non se cre esa afirmación. O español agarda a un suízo ofensivo preto da rede. O suízo avisa de que se adestrará contra zurdos para non verse sorprendido polo español. A guerra está declarada.
O torneo agarda este mércores os outros dous semifinalistas. O serbio Novak Djokovic intentarao ante o alemán Alexander Zverev e o austríaco Dominic Thiem fronte ao ruso Karen Khachanov.
No cadro feminino continuaron as sorpresas. A británica Johanna Konta derrotou á estadounidense Sloane Stephens, finalista da pasada edición, por 6-1 e 6-4, e a checa Marketa Vondrousova á croata Petra Matric por 7-6 (1) e 7-5.
A checa, de 19 anos, será a semifinalista máis nova en París desde a serbia Ana Ivanovic en 2007.
Konta é a primeira británica que alcanza o penúltimo banzo de París desde Jo Durie en 1983.
Este mércores definirase a segunda semifinal. A gran favorita é a romanesa Simona Halep, defensora do título, que se medirá a outra adolescente, a estadounidense Amanda Anisimova, de 17 anos. A australiana Ashleigh Barty xogará contra a estadounidense Madinson Keys.
