O RC Deportivo confirmou que o técnico Clarence Seedorf non dirixirá ao equipo galego en Segunda División logo de estar á fronte do plantel desde febreiro e non conseguir a permanencia na máxima categoría.
"A dirección deportiva, de acordo con Clarence Seedorf, comunica que o adestrador neerlandés non continuará á fronte do primeiro equipo branquiazul a próxima tempada, polo que a vinculación entre o técnico e o club finalizará co vencemento do contrato asinado por ambas as partes o próximo 30 de xuño de 2018", apunta o Dépor na súa web.
A entidade galega explica que o seu presidente, Tino Fernández, trasladou persoalmente ao preparador holandés que "foi un verdadeiro pracer traballar cun profesional do seu nivel".
O dirixente tamén lle comunicou que ten "capacidades para dirixir equipos de Primeira División pero que para afrontar o novo reto do Deportivo vaise a buscar un perfil de adestrador que achegue ademais experiencia e coñecemento da Segunda División española".
AGRADECEMENTO. O Deportivo indica, ademais, que Seedorf trasladoulle ao presidente que "foi unha honra defender as cores dun club histórico como o Deportivo".
"Agradezo ao presidente e a todo o equipo profesional do Dépor o traballo e dispoñibilidade durante estes meses", engade o club no texto que difundiu na súa web.
Seedorf tamén quixo dar "as grazas á afección" polo apoio e a axuda que brindou ao equipo para "ser competitivos ata o final".
"Todos merecedes ver ao Deportivo novamente en Primeira División canto antes", apunta o club galego.
O Deportivo agradeceulle publicamente e "moi sinceramente a Clarence Seedorf a súa aposta" polo conxunto branquiazul "para afrontar o tramo final" da tempada, así como "toda a dedicación, o traballo e esforzo realizados durante estes meses".
O club que preside Tino Fernández desexa "a maior das sortes" a Seedorf, que no Deportivo non puido remontar o voo e evitar o descenso a Segunda División, obxectivo polo que foi contratado en febreiro.
