Adolfo Domínguez ampliou o expediente de regulación temporal de emprego (Erte) que presentou o pasado martes das 728 persoas previstas inicialmente ata as 909, o que supón o 76% do persoal do grupo, segundo informou a través dun feito relevante á Comisión Nacional do Mercado de Valores (CNMV).
A ampliación do Erte de Adolfo Domínguez inclúe 145 profesionais da súa sede central e 36 persoas da súa rede comercial en Portugal, que se suman aos 728 profesionais da súa rede de tendas en España.
O Erte, que se suma aos previstos noutras grandes cadeas téxtiles, aplicarase aos 909 traballadores de Adolfo Domínguez ata o mes de maio, no caso de que o peche dos puntos de venda teña que prolongarse.
Adolfo Domínguez mantén abertos puntos de venda en nove países
A compañía galega asegura que as medidas excepcionais e temporais están a ser tomadas para dar cobertura legal e laboral aos empregados da compañía ante a crise do coronavirus, que ata agora obrigou ao peche de todos os seus puntos de venda propios e franquiciados en España, Francia, China, Perú, Kuwait e tamén en Portugal.
Nas plantas e oficinas dos servizos centrais da compañía permanecen traballando 190 profesionais, un 61% en réxime de teletraballo.
O grupo Adolfo Domínguez, que facturou 112 millóns de euros no último exercicio completo, mantén, a día de hoxe, máis de 160 puntos de venda abertos en nove países. Ademais, ampliou as facilidades de compra aos seus clientes a través do envío gratuíto de pedidos e, de acordo coas medidas do goberno, suspende o prazo de devolucións.
