Endesa acelera o investimento en renovables e reafirma o seu obxectivo de parar as plantas térmicas, incluíndo o peche das Pontes. Se todos os trámites seguen cara a adiante, os permisos poderían chegar a mediados de 2021 para iniciar o desmantelamento no verán. A eléctrica, que solicitou o peche da central pontesa hai case un ano, reiterou en todo momento a súa disposición a retirar a solicitude se as probas con biocombustibles demostran que a central é viable.
Desde o comité de empresa defenden que os resultados foron positivos —o groso das probas xa finalizou— pero o futuro preséntase cargado de incerteza para a planta, e ante un panorama no que o prezo dos dereitos de emisión de CO2 continúa á alza. Fontes da eléctrica aseguran que os resultados se coñecerán antes de que finalice o ano.
A compañía mantén o horizonte temporal para o peche das dúas últimas centrais de carbón da península —a das Pontes e a de Litoral en Almería— tras actualizar o seu plan estratéxico para o período 2021- 2023, unha folla de ruta na que redobra a súa aposta polas renovables. O grupo prevé investir nos próximos tres anos 7.900 millóns de euros, un 25% máis que nos tres anteriores, e reservar 40 de cada 100 euros desa contía para incrementar a xeración de enerxía limpa: 3.300 millóns, un 20% máis. Con ese diñeiro, prevé alcanzar os 11.500 megawatts solares, eólicos e hidráulicos ao final de 2023.
Ademais da actualización do seu plan estratéxico, a empresa deu a coñecer este mércores os principais obxectivos de negocio no horizonte 2030. Na próxima década pretende despregar investimentos por 25.000 millóns de euros para aproveitar as "oportunidades" derivadas do plan do Goberno para avanzar na transición enerxética e dos fondos de recuperación europeos. O 40% dese diñeiro prevé inxectalo en renovables, co obxectivo de aumentar o parque xerador en 10.000 megawatts, ata os 18.000.
Outros 40 de cada 100 euros irán destinados á rede de distribución, con intención de mellorar a seguridade e calidade da subministración e facer a rede máis eficiente. O reto é reducir o tempo medio de interrupción da subministración a 44 minutos ao ano de media, un 29% menos.
Con este megaplan investidor, Endesa prevé lograr que a porcentaxe de toda a súa produción libre de emisións de CO2 alcance o 80% ao final da década, un período que estará marcado pola descarbonización e electrificación. Os seus plans pasan por abandonar por completo a xeración con carbón, dentro e fóra da península, en 2027.
Coa súa folla de ruta, Endesa prevé aumentar o seu beneficio bruto (Ebitda) un 10% en tres anos, ata 4.300 millóns en 2023.
