A organización do Congreso Mundial de Móbiles (MWC) de Barcelona, GSMA, alegou "forza maior" para cancelar o evento, ao atribuílo ao coronavirus, o que lle exoneraría de responsabilidades económicas por suspender unha feira que se esperaba que xerase un impacto próximo aos 500 millóns de euros.
Mentres, o Goberno, nun comunicado, lamentou a cancelación do MWC e subliñou que esta decisión "non obedece a razóns de saúde pública" porque España conta cun sistema sanitario que ofrece "plenas garantías" en momentos como o da epidemia do coronavirus.
Un día despois de que a organización decidise suspender o congreso, a lupa está posta nas repercusións económicas que terá a anulación, tendo en conta que se esperaban uns ingresos en Barcelona próximos aos 500 millóns de euros, e máis de 14.000 empregos.
Outra das incógnitas é a de quen terá que sufragar as indemnizacións por esta cancelación.
Para o conselleiro delegado da patronal organizadora, John Hoffman, é unha "situación de forza maior e afirmou: "Non imos facer especulacións, veremos o que especifican os contratos. Analizaranse os termos de cada un. Tomamos esta decisión por unha epidemia".
Hoffman e o director xeral de GSMA, Mats Granryd, compareceron este xoves e fixeron fronte común con representantes das administracións públicas e Fira de Barcelona para dar explicacións pola cancelación do Mobile e traballar para próximas edicións.
Tras asegurar que non tiñan outra opción, os directivos da GSMA sinalaron que os contratos da patronal cos seus clientes inclúen cláusulas de forza maior e mostráronse convencidos de que estas son aplicables ao ocorrido estes días.
Restaron importancia ao feito de que non exista unha declaración de urxencia sanitaria que afecte a España e a Barcelona.
Granryd, que participou por primeira vez nunha rolda de prensa en Barcelona, alegou que teñen "moitas declaracións de centros de prevención europeos de control de enfermidades que din que é importante limitar ou reducir as reunións con tantos participantes".
"Non se trata de nada en contra de Barcelona ou España. Trátase da explosión dunha enfermidade. A xente está a falecer globalmente. Teriamos a milleiros de persoas reunidas en Barcelona e é o risco que queriamos evitar", apuntou.
Respecto ao custo que terá para GSMA a cancelación, os directivos aseguraron que aínda non se analizou, para subliñar que GSMA é unha asociación sen ánimo de lucro e que se cancelou o evento baseándose nunha "decisión non financeira", senón "de benestar e saúde".
Fontes do sector apuntaron que, a partir desta semana, empezará un proceso, que pode ser moi longo, de estudo de cada un dos contratos vinculados co Mobile e que podería chegar a enfrontar á mesma GSMA cos socios que viron como se cancelaba o evento sen que eles o desexasen.
Dáse por feito que as firmas tecnolóxicas que optaron por non acudir a Barcelona cando aínda se mantiña o MWC asumirán as responsabilidades económicas que se xeraron.
Á marxe de se GSMA terá que asumir algún pago, xa chegaron os primeiros cálculos sobre os efectos económicos da non celebración do congreso de móbiles.
Os comercios da capital catalá, consideran que deixarán de ingresar ata 50 millóns de euros, segundo estimacións do presidente de Barcelona Oberta, Gabriel Jené; mentres que a Cámara de Comercio da Cidade Condal estima que o impacto será duns 60 millóns no recinto de Fira.
O sector de vehículos de aluguer con condutor (VTC) deixará de ingresar uns 12 millóns de euros, mentres que os taxistas calculan que verán reducidos os seus ingresos entre un 20 e un 30 %.
Mentres que a Asociación de Apartamentos Turísticos de Barcelona (Apartur) lanzaran unhas previsións duns 14 millóns de euros.
Desde o Goberno central, a Ministra de Traballo e Economía Social, Yolanda Díaz, recoñeceu que "lle preocupa moito" o impacto que poida ter a cancelación do MWC nas cifras de desemprego deste mes de febreiro.
