O Instituto Nacional de Estadística (Ine) publicou este martes a súa enquisa anual de estrutura salarial correspondente a 2016, que sinala que o salario anual feminino representou o 77% do masculino en Galicia, que se sitúa lixeiramente por baixo da media nacional —77,7%—.
Así, as mulleres galegas recibiron un salario de 18.294,47 euros en 2016, fronte aos 23.774,21 dos homes.
A enquisa tamén reflicte que a ganancia media anual por traballador en Galicia foi de 21.082,12 euros, un 2,2% máis que o ano anterior. No conxunto de España, este incremento foi do 0,2%, ata os 23.156,34 euros.
Os salarios máis elevados en 2016 corresponderon a País Vasco (27.480,71 euros anuais por traballador), Madrid (26.330,14 euros) e Navarra (25.468,38 euros).
O das mulleres foi inferior ao dos homes en todas as comunidades, aínda que a diferenza varía dunhas a outras. Canarias presentou a menor desviación entre os salarios de homes e mulleres, mentres que Asturias, Cantabria e Navarra, son as que teñen unha maior diverxencia.
