O salario medio sobe a 1.700 brutos ao mes

En Galicia o soldo medio chega aos 1.568 euros
Cartera con dinero.

O salario medio subiu no segundo trimestre un 1,5 % interanual, ata 1.700 euros brutos mensuais, o que supón un novo máximo e continúa a tendencia á alza que iniciou na segunda metade de 2017, aínda que o incremento é máis moderado que en trimestres anteriores, segundo o último Monitor Adecco.

Segundo os datos do grupo de recursos humanos, todas as autonomías rexistraron incrementos nos seus respectivos salarios medios, salvo en Canarias, onde se mantivo practicamente igual.

Por encima da media nacional sitúanse Madrid (2.017 euros), País Vasco (1.994 euros), Navarra (1.866 euros), Cataluña (1.793 euros) e Asturias (1.714 euros).

Por baixo, Cantabria (1.637 euros), Baleares (1.616 euros), Aragón (1.590 euros), Galicia (1.568 euros), A Rioxa (1.548 euros), Comunidade Valenciana (1.545 euros), Castela e León (1.525 euros), Andalucía (1.511 euros), Castela-A Mancha (1.503 euros), Canarias (1.460 euros), Murcia (1.455 euros) e Estremadura (1.384 euros).

Segundo Adecco estas cifras tamén supoñen máximos históricos para nove autonomías: Andalucía, Asturias, Castela e León, a Comunidade Valenciana, Galicia, Madrid, Navarra, País Vasco e A Rioxa. 
O informe destaca que o salario medio español segue estando un 22 % por baixo do salario medio dos países da Unión Europea (2.172 euros mensuais).

Comentarios