O presidente de Vox, Santiago Abascal, vaticinou este luns que "moi pronto" haberá deputados desta formación no Parlamento de Cataluña "dicindo o que ninguén se atreveu a dicir".
Abascal respondeu desta forma en rolda de prensa ao ser preguntado se teñen previsto deseñar unha estratexia política específica para Cataluña e se Vox fará un desembarco" nesa comunidade para as eleccións municipais.
"Nós non imos desembarcar en Cataluña porque nós estamos en Cataluña", respondeu Abascal, que asegurou que nesta comunidade, ata este domingo, é onde creceu máis o proxecto de Vox nos últimos meses.
Subliñou que para Vox é "moi importante Cataluña porque é unha parte inseparable de España e, por suposto, non imos tirar a toalla de ningún xeito", salientou.
Indicou, neste sentido, que o obxectivo de Vox é "ir a todas as eleccións en toda España" e, no caso de Cataluña, presentarse en todos os municipios, desde os "pobos máis pequenos" ás capitais.
"Porque estamos convencidos, xa o sabemos, de que temos serias expectativas electorais", finalizou.
