A Garda Civil de Vilalba abriu unha investigación para esclarecer o roubo que sufriu o pasado día 18 un septuaxenario na súa vivenda da parroquia cospeitesa de Muimenta, na que foi atado e amordazado polo menos por dous individuos que levaban o rostro cuberto.
Ao home, que foi abordado cando ía entrar na casa onde reside só, ao redor das oito da tarde do martes da semana pasada, subtraéronlle uns 6.000 euros dunha caixa que tiña gardada nun moble da cociña.
A vítima, que presentou a denuncia no cuartel de Cospeito este mércores, desconfía que os autores do roubo poidan ser veciños da zona.
O Instituto Armado, que acudiu ao lugar para tomar mostras e pegadas despois do suceso, non descarta que se efectúe algunha detención nas próximas horas. Ademais, recordan que é mellor non gardar grandes cantidades de diñeiro en casa, e ter o necesario para o día a día.
OUTRO ROUBO NA ZONA. A finais de setembro, unha septuaxenaria de San Xurxo de Rioaveso tamén foi vítima dun roubo na súa vivenda. O ladrón, que vivía preto da muller, chegoulle a subtraer 25.000 euros.
