A procura dos dous mozos noieses de 17 e 18 anos desaparecidos na tarde do luns tras envorcar o kaiak que ocupaban nas augas de Portosín xunto a outra moza que foi rescatada unhas horas despois do suceso segue sen dar os seus froitos. Sendo xa nulas as opcións de atopalos con vida, o rastrexo dos cadáveres ampliouse este mércores ata cubrir a práctica totalidade da ría de Muros e Noia, chegando ata o Castro de Baroña, dun extremo, e do outro ata o Monte Louro.
Con todo, foi o perímetro entre punta Cabeiro e praia de Sieira —onde foi encontrada a canoa na que viaxaban os mozos— o que centrou os esforzos dun amplísimo operativo de urxencias que buscou os dous desaparecidos por terra —con efectivos de Protección Civil de Noia e Porto do Son na liña de costa—, mar —con mergulladores de Salvamento e as embarcacións Salvamar Régulus e Río Xallas da Garda Civil— e aire —co helicóptero Helimer 211—.
Trátase dun operativo de procura sen precedentes, especialmente porque non se interrompeu en ningún momento desde última hora do luns, desenvolvéndose tamén en horas nocturnas. E aínda que de momento resulte infrutuoso, os efectivos participantes confían en dar cos corpos. "Somos conscientes de que a estas alturas un cadáver non debería percorrer tanta distancia, pero queremos garantir a esas familias que se está facendo todo o posible por localizar os seus seres queridos", explicou á TVG Jorge Rodríguez, capitán da Garda Civil de Noia.
Coa súa apreciación coincide Emilio Queiruga, patrón maior da Confraría de Porto do Son. "Eu non creo que se desprazasen moito, porque o día do accidente era de moitísimo vento, pero o mar estaba en calma", observou. Ademais, recoñeceu que atopar os corpos é unha tarefa difícil. "É complexo, fixemos varias buscas, e aínda sabendo o sitio exacto por onde pasaron, no fondo do mar é moi complexo. O punto de referencia que temos é a rapaza que subiu polo cantil. Pero puideron nadar, puido levalos a corrente... ", expresa.
