A Garda Civil desarticulou unha banda itinerante especializada no roubo de tendas de telefonía que actuara en varias localidades galegas, así como en diferentes puntos de Asturias, Castela e León e Castela a Mancha.
En concreto, atribúenselle roubos en Ribadeo, Viveiro, Arteixo, Ordes, Pontevedra, Ponteareas, Boiro, Santiago de Compostela, Vigo, Tui, Porriño e Sanxenxo.
A investigación, que se iniciou o pasado mes de xaneiro tras unha tentativa de roubo perpetrada en Monforte, saldouse coa detención de tres súbditos romaneses (un menor de idade, un mozo de 20 anos e outro de 26). O grupo desprazábase desde a súa localidade de residencia, na periferia de Madrid, ata o lugar onde cometerían o roubo. Primeiro realizaban unha primeira visita para localizar determinados establecementos e volvían aos poucos días para actuar nas tendas seleccionadas.
A banda tiña 14 terminais de alta gama no momento da súa detención, once deles ocultos nun dobre fondo do vehículo no que circulaban. Os detidos serán postos a disposición do xulgado de instrución número 1 de Arévalo (Ávila) e da fiscalía de menores abulense.
