A Delegación do Goberno en Galicia autorizou este martes a celebración de caravanas de protesta contra a xestión do Goberno da crise sanitaria pola pandemia do coronavirus convocadas por Vox en todas as provincias o vindeiro sábado día 23, informaron a Efe fontes oficiais.
Hai autorizadas manifestacións en coche en todas as capitais de provincia, e polo menos na de Pontevedra, dúas, unha na cidade do Lérez e outra en Vigo, detallaron as fontes consultadas.
De feito, en Vigo houbo este luns unha concentración de protesta con cacerolas na praza de España na que participaron ao redor dunha decena de persoas ás que a Policía identificou.
Tamén este luns a Subdelegación do Goberno en Pontevedra denegou, por presentarse cunha antelación de apenas unhas horas, unha acción de protesta na cidade olívica.
Fontes da Subdelegación de Pontevedra explican a Efe que a diferenza das dúas manifestacións que prohibiu o 1 e 2 de maio, convocadas pola CUT e por un particular vinculado a Vox, respectivamente, é que entón Galicia, e todo o país, estaban nun marco de restricións máis ríxido que o actual.
A Avogacía do Estado emitiu un informe que avala a celebración das caravanas de coches convocadas por Vox para este sábado a condición de que se respecten as distancias de seguridade, o uso de máscaras e o número permitido de ocupantes por vehículo.
