O BNG anunciou este martes que, unha vez coñecidas “as condicións avanzadas polo Executivo central”, o seu voto no Congreso dos Deputados ante a solicitude dunha nova prórroga do estado de alarma será a abstención.
“O BNG vai manter a actitude construtiva que mostrou desde o inicio desta crise sanitaria, polo que non se oporá á nova prórroga das medidas necesarias para a contención e o control da pandemia, aínda que non podemos avaliar unha liña de acción na que o Goberno persiste a pesar de evidenciarse como profundamente equivocada”, detallou a formación nacionalista a través dun comunicado.
Así, o BNG referiuse ao “proceso de centralización” provocado pola declaración do estado de alarma, que supón “decidir todo desde Madrid con criterios uniformes sen tomar en consideración as características e condicións de cada país”, unha práctica “que se mostrou como inadecuada e ineficaz á hora de aplicar o operativo en Galicia”.
“Se esta centralización non tiña sentido na fase de escalada, moito menos na de desescalada, por iso rexeitamos a teimosía do Goberno de Pedro Sánchez en mantela e aumentar o despropósito coa decisión de que o ámbito de xestión sexa a provincia”, proseguiu.
A formación nacionalista entende que esta decisión “só pode entenderse polo afán de saltar as competencias das comunidades autónomas”, xa que “desde o punto de vista práctico, polo menos no caso de Galicia, non é funcional”.
Neste sentido, o BNG argumentou que os criterios do Goberno central "evidencian un descoñecemento da realidade de Galicia, moi diferente á doutros territorios do Estado", tendo en conta que a comunidade "conta coa metade de núcleos de poboación de todo o Estado" como resultado dunha poboación dispersa "que fai que concellos de máis de 5.000 habitantes non teñan ningún núcleo que se aproxime a esa cantidade".
"Dentro dunha mesma provincia, como Pontevedra, coexisten o concello urbano máis poboado, como é Vigo, con 300.000 habitantes, e outros rurais, como Dozón, con 1.200, que non poden ter o mesmo tratamento", engadiu.
Así, a formación nacionalista reiterou que o ámbito de xestión no caso de Galicia debería ser a comarca, "que responde a unha realidade xeográfica, económica e de relación social ben perceptible e, con certeza, moito máis adecuada que unha provincia".
"Por iso reclamamos unha rectificación por parte do Goberno que pase por restaurar plenamente as competencias da administración galega para, a partir de aí, poder elaborar un plan galego de desconfinamiento progresivo adaptado ás necesidades do noso país e acordado polas forzas políticas no Parlamento", expuxo.
Así mesmo, o BNG tamén destacou "a necesidade de elaborar en Galicia un plan de recuperación económica e social" que permita "atallar as consecuencias desta crise", para o que "o noso país" debería ter "capacidade para poder decidir en función dos seus propios intereses".
