jueves. 06.08.2020 |
El tiempo
jueves. 06.08.2020
El tiempo

O BNG reclama ao Goberno central a rebaixa das peaxes da AP-9

Néstor Rego. EFE
Néstor Rego. EFE
Néstor Rego censurou que o Ministerio de Fomento autorice a subida do 2,64 % destas taxas

O deputado do BNG no Congreso dos Deputados, Néstor Rego, rexistrou este xoves unha iniciativa para reclamar ao Goberno central unha rebaixa dos peaxes “abusivas” da AP-9, así como a súa transferencia á Xunta de Galicia.

“En Galicia existe unha demanda social unánime para acabar coa estafa das peaxes da AP-9 que se reflicte na reclamación unánime do Parlamento de Galicia da transferencia dunha vía que debe ser previamente rescatada polo Estado”, sostén Rego a través dun comunicado.

O deputado nacionalista precisou que, “como mínimo e de forma inmediata”, débense aplicar “rebaixas e descontos significativos” na AP-9, unha vía “fundamental para as comunicacións no eixo atlántico” e que conecta cinco das sete cidades galegas, as que conforman “a zona que concentra unha maior actividade económica”.

Deste xeito, Rego censurou que o Ministerio de Fomento autorice a subida do 2,64 % nas peaxes prevista pola empresa concesionaria -Autoestradas do Atlántico, S.A. (Audasa)- a partir do próximo 1 de xaneiro, que suporá “un incremento acumulado do 30 % nas tarifas nos últimos dez anos”.

“Outras autoestradas terminarán as súas concesións no ano 2021; a partir dese momento, Galicia quedará como o territorio con máis quilómetros de vías de pago do Estado"

Coas subidas anunciadas, o traxecto entre A Coruña e Vigo pasaría a custarlle aos turismos 16,85 euros, 0,45 máis que na actualidade, mentres que percorrido entre Ferrol e Tui subiría 55 céntimos, ata os 22,10 euros.

Para camións e autobuses, a tarifa a pagar entre Vigo e A Coruña crecería 95 céntimos, mentres que entre Ferrol e Tui esta faríao en 1,25 euros, cun total de 48,35 euros, de tal modo que, segundo denunciou o BNG, “un percorrido de ida e volta entre o norte e o sur de Galicia cun vehículo pesado custará preto de 100 euros”.

“Os máis afectados son os usuarios habituais por motivos de traballo, as empresas de transporte e os transportistas autónomos: a carga das peaxes nos custos de produción leva a que, en moitos casos, óptese polo uso de vías condicionais, con consecuencias negativas para a seguridade e o conxunto da poboación”, proseguiu Rego.

O deputado tamén denunciou o “agravio comparativo” que sofre Galicia, un territorio “castigado polo déficit de infraestruturas modernas, sostibles e adecuadas ás necesidades do século XXI”, xa que “outras autoestradas como a AP-1 (Burgos-Armiñón), a AP-4 (Sevilla-Cádiz) ou a AP-7 (Tarragona-Valencia) serán gratuítas a partir do 1 de xaneiro de 2020”.

“Outras autoestradas terminarán as súas concesións no ano 2021; a partir dese momento, Galicia quedará como o territorio con máis quilómetros de vías de pago do Estado, con 326”, concluíu Rego, quen sumou o rescate das radiais madrileñas con diñeiro público “e a subseguinte rebaixa de tarifas” á lista de agravios “” a Galicia.

O BNG reclama ao Goberno central a rebaixa das peaxes da AP-9
Comentarios