O alcalde de Vigo, Abel Caballero, proclamou este martes que acepta "o reto" do seu homólogo de Madrid, José Luís Martínez Almeida, de comparar a iluminación do Nadal de ambas as cidades: "A ver quen ten as mellores luces".
Nunha rolda de prensa, o rexedor da cidade olívica apuntou que o alcalde de Madrid retouno", e engadiu que, polo momento, Vigo adiántase no aceso (que se inaugura o 23 de novembro). "No tempo xa gañamos por goleada", chanceou.
"Veremos, cando acendan as luces, faremos a comparación. Pero como van ser mellores as de Vigo, eu invito a todo Madrid e a toda España a que vingan a velas", proclamou.
Abel Caballero explicou que este mesmo martes ponse en marcha o "reloxo da conta atrás" na fachada da Casa Galega da Cultura, que irá marcando o tempo que resta para o acto do aceso.
Segundo sinalou o rexedor vigués, todos os cidadáns, especialmente os máis novos, están a mostrar un "entusiasmo indescritible" coa iluminación do Nadal, e así o trasladou nunha entrevista emitida en Cataluña. "Xa lles dixen que ese día miren cara ao oeste verdadeiro e verán o resplandor", afirmou.
"Ao alcalde de Nova York chamareino máis tarde para que mire cara ao leste verdadeiro", engadiu Abel Caballero, quen apuntou que Vigo, Nova York e Barcelona, están "na mesma latitude".
