O Ministerio de Sanidade valorou a diminución de casos de coronavirus e o diagnóstico e illamento precoz entre os factores para o avance de Galicia á fase 2 da desescalada o pasado 25 de maio. O informe que o detalla publicouse esta semana, unha vez que as comunidades autónomas que faltaban avanzaron á fase 2, mentres que outras, como Galicia, xa pasaron este luns á 3.
No documento destácase que nos sete días previos ao cambio de fase anterior, entre o 11 e 17 de maio, confirmáronse en Galicia por PCR 24 casos positivos na Coruña, tres en Lugo, 12 en Ourense e seis en Pontevedra. Sanidade destaca que "a capacidade diagnóstica mediante PCR aumentou pola adquisición de novos equipos e pola automatización de procesos, situándose en 6.500 diarias".
Ademais, subliña que o plan de continxencia de asistencia hospitalaria de Galicia "prevé a posibilidade de levar a cabo movementos de pacientes entre centros sanitarios, de forma que se faltasen camas en Pontevedra poderíanse derivar á provincia da Coruña, podendo alcanzar 38 camas por cada 10.000 habitantes entre as dúas provincias".
En canto ás camas de coidados críticos, o ministerio valorou que "en 24 horas poderían estar dispoñibles: 2,1 por cada 10.000 habitantes na Coruña; 1,7 en Lugo e en Ourense, e 1,9 en Pontevedra".
Sanidade constata que o illamento dos casos realizouse o mesmo día de inicio de síntomas, excepto en Lugo
Sanidade tamén tivo en conta que "se reforzaron notablemente todas as áreas tanto con recursos materiais como humanos". E incide no "sistema de vixilancia que integra información de distintas fontes" do que dispón Galicia.
Tamén valorou que se reforzou a toma de mostras tanto a nivel domiciliario como en puntos aos que se acode co coche". E recorda a "ferramenta para a axuda no seguimento domiciliario dos casos" e o "call center para o seguimento de contactos". Apunta así mesmo que se identificaron aloxamentos que se poderían utilizar para o illamento de casos se fose necesario".
Nesa liña, o ministerio ten en conta que "en todas as provincias o illamento dos casos realizouse o mesmo día de inicio de síntomas, excepto en Lugo que foi tres días despois, pero no mesmo día da consulta".
A iso suma Sanidade que a comunidade galega "dispón dun protocolo conxunto de Sanidade e Política Social para a xestión dos centros sociais residenciais", nos que se realizaron probas de Covid-19 a todos os residentes e traballadores. "Das 260 residencias de maiores que hai en Galicia, nos últimos 14 días producíronse casos en catro da Coruña e en dous de Ourense", engade.
"Desde a transición a fase 1 diminuíu o número de casos en todas as provincias galegas, realizouse proba de PCR a todos os casos sospeitosos e a positividad destas probas diminuíu", conclúe Sanidade, que valorou, ademais, que "diminuíu a ocupación de camas de hospitalización de agudos e de críticos por casos Covid-19".
