Catro dos seis detidos este mércores como sospeitosos de integrar unha banda delituosa ao que se lle atribúe preto dun centenar de roubos con forza en Vigo, Baiona e O Morrazo, foron trasladados este xoves a un Xulgado de Vigo para comparecer antes as autoridades xudiciais.
Un total de quince persoas, varias delas menores de idade fuxidas de centros tutelados, están a ser investigadas na operación desenvolvida en Vigo que se saldou con seis detidos pertencentes a tres supostas "bandas latinas" asentadas na zona sur da provincia de Pontevedra, segundo a Garda Civil.
Catro dos principais detidos foron trasladados este xoves por axentes da Garda Civil ao Xulgado de instrución número catro de Vigo, que dirixe a investigación contra unha suposta banda criminal autodenominada Los Betas que "estaba a adquirir roles propios dunha banda de orixe dominicano", segundo os investigadores.
A operación, que continúa aberta, saldouse, polo momento, con seis detidos maiores de idade e constou de catro rexistros de forma simultánea, un dos cales acabou coa caída dunha muller por unha fiestra, que se atopa en estado grave, aínda que fóra de perigo.
Fontes xudiciais explicaron que os quince investigados están vinculados coa suposta comisión dun centenar de delitos entre os que figuran roubos -tiróns-, furtos de móbiles, acosos, lesións e ameazas en Vigo, Cangas do Morrazo e Baiona.
O delegado do Goberno en Galicia, Javier Losada, confirmou que a investigación sobre estas bandas ás que se lle atribúe un comportamento de delincuencia "perigosa" iniciouse hai dous anos e segue aberta, polo que non descartou novas detencións en próximas horas.
Catro membros da presunta banda delituosa pasan a disposición xudicial en Vigo
Ao grupo criminal autodenominado Los Betas atribúeselle preto dun centenar de roubos con forza en Baiona, O Morrazo e a cidade olívica
