Os centros educativos frean o ascenso de casos, con 1.298 positivos e 70 aulas pechadas

As áreas sanitarias da Coruña e Lugo manteñen a tendencia á alza nos contaxiados, mentres que o resto de zonas descenden 
Aula vacía. ARQUIVO.
photo_camera Aula vacía. ARQUIVO.

A incidencia da pandemia do coronavirus en escolas infantís, colexios e institutos de Galicia freou a tendencia á alza nos últimos días, xa que os casos activos baixaron en catro con respecto aos datos do sábado, ata situarse no total de 1.298 este martes. 

Ademais, de acordo cos datos ofrecidos pola Xunta actualizados a última hora do luns, as aulas en corentena reducíronse nunha, até as 70. Mentres tanto, a escola infantil Golfiños de Lugo continúa como único centro de toda a Comunidade que permanece pechado, con cinco casos de coronavirus. 

Dos case 1.300 positivos, 382 rexístranse na área sanitaria de Vigo, onde hai 18 clases clausuradas --oito menos que no parte anterior--. O caso máis importante desta zona e un dos maiores de toda Galicia é o do colexio privado Apóstolo Santiago Xesuítas, que continúa cun total de 20 contaxios e 10 aulas en corentena, ademais duns 200 alumnos que tiveron que gardar illamento. 

Outros focos importantes na área viguesa son o do CEIP San Salvador, o CPR Mendiño e o CPR Pluriling~e San Fernando, que reportan 11 positivos cada un. Así mesmo, hai nove infectados no IES Alexandre Bóveda da cidade, os mesmos que no CEIP Pluriling~e As Solainas - Nicolás Gutiérrez Campo da Guarda.

A CORUÑA E LUGO SOBEN. En canto á área da Coruña, pola súa banda, rexistra un aumento ao notificar 234 positivos --22 máis-- e 18 aulas en corentena --sete máis--. Aquí, o CEIP Fogar de Carballo equiparouse ao Apóstolo Santiago Xesuítas de Vigo ao sumar sete positivos máis, até a vintena, aínda que soamente ten dúas clases pechadas. Tamén na área coruñesa cabe destacar o IES Maximino Romeu de Lema de Zas, que rexistra unha decena de contaxios. 

Ademais, a área de Lugo conta con 171 positivos, 12 máis, e as unidades postas en corentena son 12, catro máis. Á parte da gardaría Golfiños, que está pechada, os focos máis importantes son o IES Lucus Augusti da capital provincial e o CEIP Laverde Ruiz de Outeiro de Rei, con oito infectados cada unha.

O RESTO BAIXAN. Tras esta, sitúase a área sanitaria de Pontevedra, que se estabilizou con 149 casos activos de coronavirus (-3) e oito aulas clausuradas (-1). Os casos máis graves desta zona son o IES Gonzalo Torrente Ballester --sete positivos--, o IES Chan do Monte de Marín --outro sete-- e o IES Francisco Asorey de Cambados --seis--. 

Tamén a área de Santiago experimentou unha baixada, ao contabilizar este martes 134 positivos --cinco menos-- e seis clases pechadas --as mesmas--, especialmente no CPR Plurilingüe San José de Cluny, con nove infectados e o CIFP Compostela, con sete. 

A zona de influencia de Ferrol descendeu até os 124 casos activos de covid-19 (-14) e dúas aulas afectadas (-3), co IES Concepción Arenal e o IES de Catabois como principais focos ao reportar seis contaxiados. 

Finalmente, a área sanitaria de Ourense figura como a menos afectada despois de que durante semanas fose o epicentro da pandemia en Galicia. Así, este martes --con datos do luns-- notifica 104 casos activos de coronavirus, tres menos, e mantense con seis unidades en corentena. 

Os centros ourensáns que suman máis infectados de covid-19 son a escola infantil de Allariz --cinco, con dúas aulas pechadas-- e o IES O Couto, o CPR María Auxiliadora e o IES Universidade Laboral --catro positivos cada un--. 

Comentarios