jueves. 02.07.2020 |
El tiempo
jueves. 02.07.2020
El tiempo

A Cidade de Xustiza de Vigo encarécese 10 millóns e as obras alárganse un ano

El vicepresidente de la Xunta, Alfonso Rueda, acompañado por el director de la obra y el arquitecto Alfonso Penela, durante la presentación de la segunda fase de la Ciudad de la Justicia de Vigo. XUNTA DE GALICIA
El vicepresidente de la Xunta, Alfonso Rueda, acompañado por el director de la obra y el arquitecto Alfonso Penela, durante la presentación de la segunda fase de la Ciudad de la Justicia de Vigo. XUNTA DE GALICIA

O mal estado dos edificios anexos da torre do antigo hospital Xeral obrigará á Xunta a realizar un modificado do proxecto

O mal estado dos edificios anexos da torre do antigo hospital Xeral obrigará á Xunta a realizar un modificado, que xa tramita, do proxecto de Cidade da Xustiza de Vigo, que o encarecerá 10 millóns de euros e alargará o prazo das obras practicamente un ano, ata agosto de 2020.

Así o anunciou o vicepresidente da Xunta, Alfonso Rueda, durante unha visita ás obras da futura Cidade da Xustiza, que xa sufriu outro "contratempo" previo, durante os labores de derriba, ao aparecer amianto, o que encareceu o proxecto, orzado nuns 28 millóns de euros, nun millón adicional.

O arquitecto Afonso Penela sinalou que "calquera intento de salvar" as ás da torre do antigo Xeral "sería máis arriscado, complicado e custoso" que derrubalos e volvelos a construír, como se fará finalmente.

Penela indicou que, "paradoxalmente", estes anexos que se construíron anos despois que a torre están en peores condicións, con estruturas metálicas deficientes ou forxados sen capa de compresión, o que achacou a que se fixeron con "improvisación" e nun escenario de necesidades "urxentes".

O arquitecto descartou que, en diante, poidan xurdir novos "imponderables", que, recordou Alfonso Rueda, xa se advertiu desde o principio que podían darse, dada a envergadura da obra e porque non se constrúe sobre nova planta.

Tamén rexeitou tocar nada do proxecto a pesar das posibilidades que dá construír de novo os espazos que ocupaban os anexos por unha cuestión de prazos.

O vicepresidente da Xunta sinalou sobre o modificado do proxecto que implica unha serie de trámites internos na Xunta, incluída unha consulta ao Consello Consultivo, que xa está feita, e que esta semana irá ao Consello da Xunta. "Intentamos perder o mínimo tempo posible", aseverou Rueda, quen confía en que na tramitación dos permisos municipais "non haxa ningún problema porque está perfectamente xustificado", posto que ata agora houbo "toda a colaboración" por parte da administración local.

Sobre o futuro uso dos actuais edificios xudiciais de Vigo unha vez se traslade toda a actividade á Cidade da Xustiza, Rueda indicou que a Xunta está a traballar coa Universidade para ver se podería aproveitar un dos dous edificios. Porque para o outro inmoble da rúa Lalín, a Xunta insiste na súa proposta ao Ministerio de Cultura de que albergue a biblioteca do Estado.

Unha opción que o alcalde de Vigo, Abel Caballero, volveu a rexeitar ao considerar que a biblioteca do Estado debe erixirse sobre un edificio singular, tal e como propón, nos terreos anexos que expropiou o Concello, en principio para a Cidade da Xustiza, e non nun "bodrio".

A Cidade de Xustiza de Vigo encarécese 10 millóns e as obras...
Comentarios