jueves. 22.10.2020 |
El tiempo
jueves. 22.10.2020
El tiempo

CIG e SOS Sanidade Pública abren a porta a unha folga de Atención Primaria en maio

Médicos vigueses descontentos con la desconvocatoria de huelga. EP
Médicos vigueses descontentos con la desconvocatoria de huelga. EP

O sindicato e o colectivo lamentan que se lle dera "un voto de confianza" ao PP

CIG-Saúde e a Asociación Galega para a Defensa da Sanidade Pública apoian convocar unha segunda xornada de folga en Atención Primaria no mes de maio se "non hai avances" na negociación dos acordos alcanzados o pasado luns que levaron a desconvocar os paros neste nivel asistencial en Galicia dos días 9, 10 e 11 de abril. 

A través dun comunicado de prensa, CIG-Saúde lamentou que se "desconvocara a folga" de abril e se lle dera "ese voto de confianza ao goberno do PP" que, matizou, "non é digno de tal". 

Por iso, a responsable de CIG-Saúde, María Xosé Abuín, advertiu de que van convocar unha reunión da plataforma "en breve" para "propor retomar a folga no mes de maio" se o día 26 de abril "o Sergas non trae á mesa sectorial as propostas para desenvolver os acordos alcanzados" o pasado 8 de abril. "Estamos dispostos a incrementar a mobilización a todos os niveis", avisou. 

Abuín incidiu en que o pasado luns se asinou o acordo de negociación de todos os temas denunciados referidos "á deterioración da Atención Primaria" e "transcorridas menos de 24 horas xa fixeron saltar todo polo aire". 

Así, criticou que "tan só uns días despois da firma deste acordo desde o presidente da Xunta, ata o xerente do Sergas, pasando polo portavoz de sanidade no Parlamento e incluso o propio conselleiro de Sanidade, en comparecencia parlamentaria, retiraron publicamente o apoio ao acordo asinado no ámbito da negociación", sostivo Abuín.

CONCENTRACIÓNS. Nesta liña, a Asociación Galega para a Defensa da Sanidade Pública incidiu en que a convocatoria de folga da Coordinadora de Atención Primaria para abril "conseguiu cambiar a actitude da administración" dado que, "a menos en aparencia, aceptou negociar os cinco puntos reivindicados para empezar a recuperación da Atención Primaria e negociar posteriormente medidas para mellorar os problemas con todas as organizacións sen exclusións", apostila. 

"A experiencia mostra que o Sergas pode ter a tentación de non pór en marcha estas medidas, polo que é necesario manter a unidade e a mobilización en apoio á negociación na mesa sectorial", sostén a asociación. 

Ademais, advirte de que "se non houbese avances, sería necesario, ademais de manter as concentracións, convocar a segunda xornada de folga na Atención Primaria", se "os pasos non son na dirección correcta", abunda. 

Este xoves en diversas localidades galegas leváronse a cabo concentracións en centros de saúde polo Día da Atención Primaria. "Aquí estamos e seguiremos con mobilizacións mentres non haxa solucións efectivas para a situación de sobrecarga da Atención Primaria", advirten ao Sergas.

CIG e SOS Sanidade Pública abren a porta a unha folga de Atención...
Comentarios