martes. 21.01.2020 |
El tiempo
martes. 21.01.2020
El tiempo

Científicos da USC crean partículas capaces de penetrar un tumor e levar fármacos ao seu interior 

Grupo de Marcos García Fuentes nos laboratorios do CiMUS. USC
Grupo de Marcos García Fuentes nos laboratorios do CiMUS. USC

A técnica"está chamada a mellorar a situación dos enfermos do tumor cerebral máis común e letal", cuxa taxa de supervivencia aos cinco anos "é menor do 5%"

Un equipo do Centro de Investigación en Medicina Molecular e Enfermidades Crónicas (CiMUS) da Universidade de Santiago de Compostela creou unhas nanopartículas capaces de penetrar un tumor cerebral e transportar fármacos xenéticos ao interior das súas células malignas. 

A técnica, desenvolvida polo grupo dirixido polos investigador Marcos García Fuentes en colaboración co Instituto de Saúde Carlos III e a Universidade de Nottigham, "está chamada a mellorar a situación dos enfermos do tumor cerebral máis común e letal", cuxa taxa de supervivencia aos cinco anos "é menor do 5%". 

Tal como destacou a Universidade de Santiago, o tratamento actual para este tumor baséase na cirurxía de extirpación, e logra unha supervivencia media de pouco "máis de 14 meses". 

A utilización de medicamentos capaces de silenciar xenes causantes de tumores ten "un enorme potencial" para o desenvolvemento de terapias "específicas, personalizadas e efectivas" no tratamento do cancro. 

Con todo, a utilización de fármacos xenéticos "non ten aínda unha ampla aplicación", xa que "menos dunha de cada cen destas secuencias terapéuticas consegue chegar ao interior da célula para realizar a súa acción". 

Os científicos da Universidade de Santiago ensaiaron en ratos o uso de novos nanomateriais como vehículos capaces de mellorar o transporte de medicamentos xenéticos contra o cancro. 

"O segredo deste material é unha estrutura que se volve insoluble nos arredores acedos das vesículas dixestivas, inducindo a súa desestabilización e permitindo ao medicamento xenético escapar ao interior celular", sinalou Marcos García. 

O obxectivo deste novo tratamento é que se realice como complemento á cirurxía de extirpación e ao mesmo tempo que a quimioterapia, para conseguir que as células tumorais non se reproduzan. 

"A idea é implantala directamente no cerebro, por exemplo, aproveitando a extirpación, porque a vía intravenosa é moi complicada e ten menos probabilidades de éxito", asegurou García. 

O investigador engadiu que, aínda que ata que non se realicen ensaios clínicos non se saberá con seguridade, os resultados preliminares indican que o efecto da terapia xenética vai estar limitado a unha ou dúas semanas, o que implicaría que o paciente debería realizar ciclos do tratamento da mesma xeito que se fai coa quimioterapia. 

Científicos da USC crean partículas capaces de penetrar un tumor e...
Comentarios