Tres crimes que paralizaron Galicia encaran a súa semana clave

A sentenza de Diana Quer uniríase ao xuízo de Ana Enjamio e a reapertura do caso Déborah
Diana Quer, Ana Enjamio y Deborah Fernández. ARCHIVO
photo_camera Diana Quer, Ana Enjamio e Déborah Fernández. ARCHIVO

Tres dos crimes máis mediáticos da crónica negra galega do século XXI encaran unha semana que pode resultar clave para o seu desenlace definitivo. Así, está previsto que este luns arrinque en Vigo o xuízo polo asasinato de Ana Enjamio, mentres que en Tui tamén se reabrirá con novas declaracións a causa sobre a misteriosa desaparición e morte de Déborah Fernández. E a ambos os procesos podería sumarse a sentenza sobre o caso de Diana Quer.

Este último é precisamente o acontecemento que está máis no aire, xa que a diferenza dos outros dous casos, aquí non existe un cronograma xudicial concreto. Espérase que antes do venres o xuíz poida ditar sentenza para José Enrique Abuín Gey, O Chicle, logo de recibir o verdicto do xurado popular o sábado 30 de novembro. Aínda que non se trata dunha ciencia exacta, atendendo a outros procesos similares fíxose público o fallo definitivo antes dos 15 días, o que leva a algunhas fontes a puntar a esta semana como clave para o desenlace do crime máis mediático dos últimos anos en Galicia xunto ao da nena Asunta Basterra.

Declarado culpable de privación de liberdade, agresión sexual e asasinato, ninguén dubida da condena exemplar que recibirá O Chicle, aínda que a incógnita que despexará a sentenza é se o barbancés é condenado ou non a prisión permanente revisable.

En Vigo, pola súa banda, arrinca este luns o xuízo contra César Adrio, acusado de matar á moza Ana Enjamio no portal da súa casa de Vigo logo dunha cea de Nadal da empresa e tras manter ambos unha relación. O acusado enfróntase a 27 anos de prisión polo crime da moza, natural do Boqueixón, do que se cumpren agora precisamente tres anos.

E para rematar, o misterio ao redor da desaparición e posterior morte de Déborah Fernández volve á primeira plana case dúas décadas despois dun suceso tan estraño como mediático ocorrido entre Vigo e O Rosal. Será a través da reapertura do caso, pola que leva moito tempo loitando a familia da vítima e que se materializará coa declaración de seis testemuñas nos xulgados de Tui, dos que tres o farán por primeira vez. Por iso, a información pode resultar vital para arroxar luz sobre esta traxedia.

Trátase, en definitiva, de tres crimes que conmocionaron e incluso paralizaron á sociedade galega, cada un no seu momento. Unha traxedia común porque comparte ademais unha característica básica: trátase da morte violenta de tres mulleres novas.

Diana Quer
Madrileña que veraneaba na Pobra, Diana Quer desapareceu nese pobo volvendo a casa de festa o 22 de agosto de 2016. O seu cadáver apareceu en Fin de Ano de 2017 e detívose ao Chicle. Tiña 18 anos

 

Ana Enjamio
Ana Enjamio, enxeñeira natural de Boqueixón de 25 anos, foi asasinada o 16 de decembro de 2016 no portal da súa casa de 28 puñaladas, 12 delas no corazón. Fíxoo un compañeiro de traballo e ex seu.

 

Déborah Fernández
A viguesa Déborah Fernández Cervera saíu a correr por Samil o 29 de abril de 2002 e desapareceu. O seu corpo foi achado días despois nunha cuneta do Rosal. Tiña 22 anos. O caso arquivouse en 2010.