Galicia rexistrou nas últimas horas tres novas mortes de persoas con covid-19, o que eleva a 776 as vítimas na comunidade. Son una muller de 96 anos dunha residencia de Oleiros que faleceu o mércores e dous casos coñecidos xa na tarde deste xoves: o dun home de 57 anos no Complexo Hospitalario Universitario de Ourense e outro de 61 no hospital Montecelo (CHOP).
Este varón é un veciño de Vilanova de Arousa pai dunha das traballadoras que resultou infectada no brote detectado hai dúas semanas nunha empresa avícola situada en Cambados.
O balance diario publicado este xoves polo Sergas amosa tamén que, con respecto aos datos facilitados o mércores, detectáronse outros 289 positivos máis en Galicia e os casos activos soben lixeiramente a 4.083, o que supón 15 máis que 24 horas antes.
Por áreas sanitarias, a peor situación segue sendo a de Ourense, onde se sumaron en vinte e catro horas 85 novos positivos e alcanzouse a cifra de 1.148 casos activos, 25 máis que o mércores, pese ao confinamento perimetral da capital provincial (que concentra 536) e do concello lindeiro de Barbadás que entrou en vigor a medianoite.
Na residencia de Pereiro de Aguiar hai 109 maiores contaxiados e na de Monterrei son 46
Ademais, rexistráronse descensos na Coruña (784, tres menos), Lugo (483, tres menos), Pontevedra (613, dezasete menos) e Ferrol (102, seis menos). No caso de Vigo, houbo un aumento de 18 casos, ata os 408 actuais; e un máis en Santiago, ata os 545.
Do total de pacientes, 35 están en Uci, 187 en unidades de hospitalización convencionais e o resto nos seus domicilios.
DOUS GROMOS EN RESIDENCIAS DE OURENSE. As autoridades sanitarias detectaron dous novos gromos de grandes dimensións en residencias da provincia de Ourense, a máis afectada en Galicia nestes momentos pola covid-19, que suman máis de 150 infectados.
En concreto, trátase da residencia Os Gozos, de Pereiro de Aguiar, onde se detectaron 106 novos contaxios de coronavirus, así como a residencia Val de Monterrei, onde hai 46 usuarios infectados.
Con iso, na residencia de Pereiro de Aguiar son xa 109 os maiores contaxiados, o que a converte no segundo centro de Galicia con máis casos tras a DomusVi Lugo, de Outeiro de Rei, que mantén 130 casos activos, aínda que alí están en diminución.
Así mesmo, a residencia Val de Monterrei, con 46 afectados, convértese na terceira con máis casos, unha cifra que iguala con outro centro da provincia de Ourense, Nosa Señora do Viso, de Lobeira. A Residencia do Incio, pola súa banda, mantén 42 usuarios infectados.
A evolución da covid-19 na provincia de Ourense nos últimos días levou á Xunta a impoñer nesta provincia algunhas das medidas máis duras para a súa contención, entre elas o confinamento perimetral da cidade de Ourense e do municipio de Barbadás, que están pechados desde este xoves.
