Dia pacta unha subida do soldo dos seus empregados en Galicia

Forma parte do novo convenio colectivo para o período do 1 de xaneiro de 2019 ao 31 de decembro de 2021
Un supermercado DIA. EP
photo_camera Un supermercado Dia. EP

A cadea de supermercados Dia alcanzou un preacordo cos sindicatos Fetico, CCOO e UXT FeSMC polo que pactou unha subida de ata o 6,8% de soldo para os dous próximos anos para algúns dos seus empregados —entre os que se atopan os das provincias de Ourense e Lugo— no marco do novo convenio colectivo para o período do 1 de xaneiro de 2019 ao 31 de decembro de 2021. 

En concreto, neste preacordo, que afectará a 16.000 traballadores da compañía, unificáronse os módulos A e B nun único, que terá un salario para 2020 de 13.700 euros, e para o 2021 de 14.000 euros, segundo informaron a Europa Press fontes sindicais. 

Desta forma, os traballadores de Dia en Castelló, Palencia, Sevilla, Dos Hermanas, Cuenca, Xaén, Avila, Ourense, Lugo, León, Soria e Huesca terán un incremento salarial dun 4,63% en 2020 e un 2,19% en 2021, un 6,82% máis nos dous próximos anos

Pola súa banda, os empregados da firma en Asturias, Tarragona, Madrid, Xirona, Alacante, Valencia e Cantabria rexistrarán unha subida do 2,69% en 2020 e do 2,19% en 2021, o que supón un incremento nos dous anos dun 4,88%. 

Sindicatos e patronal tamén acordaron o mantemento da xornada laboral actual de 1.784 horas

Para o resto de módulos, que afecta os traballadores das demais provincias —entre as que están A Coruña e Pontevedra—, o incremento salarial será dun 1,1% para este ano e do 1% para 2021.

GRATIFICACIÓN EXTRAORDINARIA. No preacordo pactouse tamén unha gratificación extraordinaria de 100 euros en compensación por 2019 aos traballadores que teñan un salario anual fixo ou inferior aos 23.000 euros

Sindicatos e patronal tamén acordaron o mantemento da xornada laboral actual de 1.784 horas, así como do mantemento do 100% do salario en caso de IT. 

No preacordo fixouse respecto ao salario variable, ademais do incremento igual ao do salario, garantir o tramo 2 a todos os traballadores que actualmente o perciben, sen necesidade de avaliacións, converténdose así en fixo durante a vixencia do convenio. Da mesma xeito garántese o tramo 4 a todos os traballadores que o percibiron durante seis meses no ano anterior. 

Dia quixo agradecer o "espírito de colaboración" dos axentes sociais co ánimo de chegar a este acordo

Desta forma, os sindicatos valoraron de forma "positiva" a firma deste preacordo, xa que sinalan que "cumpre as expectativas" que se marcaron ao principio desta negociación, tendo en conta a "difícil situación" que actualmente atravesa a empresa. 

Pola súa banda, Dia quixo agradecer o "espírito de colaboración" dos axentes sociais co ánimo de chegar a este acordo, que supón un "fito moi importante" para a compañía e os seus traballadores. 

Desta forma, a cadea de supermercados subliñou que os acordos alcanzados "reflicten a confianza de todos por un futuro sostible e a aposta por este proxecto de cambio".