O presidente da Xunta, Alberto Núñez Feijóo, comparou este mércores ao BNG con Vox por "coincidir moito" en cuestións como "impor o monolingüismo" e sinalou a ambas as formacións como "firmes aliados dun Goberno do PSOE". "Iso non hai quen o poida discutir", sentenciou.
Ante estas palabras, a portavoz nacional do Bloque, Ana Pontón, lembroulle que quen goberna co partido de Santiago Abascal, ao que definiu como "extrema dereita", é "o PP" en Andalucía. Non en balde, tamén lle dixo a Feijóo que "para estar centrado, o ve un pouco obsesionado con Vox".
Durante a sesión de control ao Executivo no Parlamento autonómico, o tamén presidente dos populares de Galicia puxo o foco nas similitudes que gardan ambas as formacións, que aseguran que "hai unha lingua castigada e perseguida por Feijóo". "Vostedes (BNG) din que é o galego e os de Vox que é o español", puntualizou.
Ademais de ter os mesmos votos en Galicia, teñen moito en común. Vostedes e Vox pásanse todo o día criticando ao PP de Galicia. Non queren uns a nación española e non queren outros a autonomía de Galicia. Uns din que España nos rouba e outros din que as autonomías lles rouban", abordou.
Así, e tras pór encima da mesa as alianzas do BNG para concorrer aos comicios europeos, pediulle a Ana Pontón que "non dea leccións de moderación a ninguén" porque "non hai nada máis antigalego que pedir o voto en nome de Galicia para Bildu e ERC".
POLÍTICA TERRITORIAL. O presidente da Xunta tamén aproveitou a pregunta do portavoz socialista, Xoaquín Fernández Leiceaga, para atacar ao Goberno central, que mentres "recoñece un déficit de infraestruturas" no noroeste peninsular, o "investimento real" en Cataluña crece un 60% e diminúe un 30% para Galicia.
Así o evidenciou despois de que Leiceaga lle demandase "cambiar" as súas políticas "pouco eficaces" en cohesión territorial e contra o despoboamento na comunidade, posto que "tras dez anos" o desequilibrio entre zonas rurais e urbanas "non fixo máis que aumentar".
Neste sentido, o socialista citou ao Instituto Galego de Estatística (Ige), que apunta "un futuro complicado" para a "maioría" de comarcas de interior, que perderán "un 20% da poboación en 15 anos".
Na súa última resposta, o titular do Executivo autonómico recalcou a súa "indignación" coa política orzamentaria do PSOE e referiuse así ás 200.000 familias que "non saben a quen vender a madeira" despois de que o Goberno decidise non seguir defendendo a prórroga da concesión a Ence en Pontevedra.
Así mesmo, reivindicou a súa xestión á fronte da Xunta cos 70 millóns de euros que mobiliza a industria aeronáutica no polo de Rozas, en Lugo, e con que o 30% dos Orzamentos autonómicos están destinados ás dúas provincias do interior a pesar de que supoñen o 24% da poboación da comunidade.
EMPREGO. Por outra banda, o portavoz de En Marea, Luís Villares, encargouse de censurar a política de emprego do Goberno de Feijóo, que provocou, segundo as súas cifras, que en dez anos haxa 97.000 persoas menos entre a poboación activa. Ademais, lamentou que os postos de traballo que se crean estean "baseados na estacionalidade".
