O Goberno galego solicitou á empresa a paralización temporal das obras do parque eólico de Serra do Oribio, nos municipios de Samos e Triacastela, de acordo co que ordena o auto do Tribunal Superior de Xustiza de Galicia (TSXG) que transcendeu esta semana. Con todo, o Executivo autonómico pretende recorrer esta decisión.
"Recorreremos ante o TSXG porque entendemos que ese parque se tramitaba conforme a dereito", defendeu o presidente galego, Alberto Núñez Feijóo, ao termo do Consello da Xunta.
Igualmente, o xefe do Executivo autonómico ha recordado que o parque como tal foi autorizado "en 2007" polo anterior Goberno bipartito e precisou que o que fixo a actual Xunta é aprobar unha modificación (a que anula o TSXG) para "repotenciar e diminuír o número de muíños".
"Hai unha confusión porque este parque non é novo e foi autorizado non por este Goberno, senón polo anterior", subliñou Feijóo, quen puxo o acento en que "hai xente que protesta agora" e que non o fixo cando se impulsou o parque no momento inicial.
En todo caso, sinalou que "os temas eólicos" sempre son obxecto de bastantes "recursos" e exemplificou cos que se puxeron en marcha despois de que a actual Xunta anulase o anterior concurso do bipartito para pór en marcha o seu, que obtivo –defendeu Feijóo– o respaldo xudicial "para seguir adiante".
A Serra do Oribio está catalogada como ZEC (zona especial de conservación) Ancares-Courel, Rede Natura 2000, así como ZEPVN (zona de especial protección dos valores naturais), con destacada riqueza en valores etnográficos e culturais.
A poboación atópase dividida: por unha banda hai plataformas ecoloxistas e veciños contrarios ao parque eólico e por outra están os partidarios de que se constrúa pola riqueza que, ao seu xuízo, levará á zona.
