miércoles. 21.10.2020 |
El tiempo
miércoles. 21.10.2020
El tiempo

Feijóo pon o foco sobre as festas universitarias e alerta da mala evolución do covid en Galicia

O presidente da Xunta, Alberto Núñez Feijóo, durante a rolda de prensa deste xoves tras a reunión do Consello. LAVANDEIRA JR. (EFE)
O presidente da Xunta, Alberto Núñez Feijóo, durante a rolda de prensa deste xoves tras a reunión do Consello. LAVANDEIRA JR. (EFE)
Non descarta reducir o límite de persoas nas reunións: "Os comportamentos irresponsables producen mortes" ►Este sábado comezará a funcionar a app autonómica PassCovid

O presidente da Xunta, Alberto Núñez Feijóo, advertiu este xoves de que a evolución da covid-19 en Galicia "non está a ser boa", a pesar de estar "mellor que noutras zonas de España", e fixo un chamamento contra "os comportamentos irresponsables", especialmente entre os universitarios que celebran festas en pisos, xa que "producen mortes".

Tras a reunión semanal do Executivo autonómico, Núñez Feijóo recordou que esta semana o comité clínico que asesora á Xunta decidiu limitar as reunións de persoas non convivientes a dez e advertiu de que aínda se podería reducir máis, sobre todo para limitar as reunións en pisos de universitarios.

PREOCUPACIÓN POR SANTIAGO. O presidente galego chamou a atención sobre o aumento de casos en Santiago, que cunha ampla poboación universitaria, é a segunda cidade máis afectada de Galicia, con 200 casos por cada 100.000 habitantes en catorce días fronte aos 137 de media do conxunto da comunidade.

"No caso de que nos pisos universitarios síganse producindo este tipo de situacións pois o comité clínico poderá ditar algunha medida adicional", declarou Núñez Feijóo, que descartou "a día de hoxe", limitar os movementos na capital galega, do mesmo xeito que ocorre en Ourense e noutras localidades desa provincia.

Núñez Feijóo recordou que hai dúas semanas xa alertara sobre "comportamentos illados, irresponsables" na capital galega e "quince días despois vemos unha evolución negativa", destacou.

"Quero ser moi claro: os comportamentos irresponsables na pandemia producen mortes; é bo dicilo sen molestias nin eufemismos", xa que teñen "dramáticas consecuencias".

En cambio, sinalou, as actitudes responsables –o uso de máscara, o mantemento das distancias e o lavado de mans– salvan vidas.

Sobre a actitude destes mozos, Núñez Feijóo considerou que poden ter a "sensación" de que non van transmitir a enfermidade, aínda que a saúde dos seus pais ou avós "si pode estar en risco".

COMPETENCIAS PARA MULTAR. O presidente galego fixo un chamamento tamén a "repensar" a contía das multas nas ordenanzas municipais porque "non ten sentido que os estudantes pensen que lles sae a conta pór cinco euros cada un e pagar a multa. Iso é un disparate epidemiolóxico", censurou.

Ademais, neste punto, recordou o ditame do Consello Consultivo, emitido por mor dunha consulta da Xunta, que avala aos concellos a incoar e tramitar as sancións por incumprimentos das medidas para deter o covid.

Preguntado por se a situación desta enfermidade está a obrigar a aprazar operacións, Núñez Feijóo dixo que "agora" non hai problemas de dispoñibilidade de camas convencionais ou de prazas en coidados intensivos.

PASSCOVID. En canto a distintas medidas para loitar contra a pandemia, Núñez Feijóo revelou que este sábado comezará a funcionar a app autonómica PassCovid, que será "complementaria" da aplicación estatal Radar Covid.

Entre outras utilidades, a aplicación galega ofrecerá información actualizada sobre a situación da pandemia, de modo que cada usuario poida consultar as restricións ou medidas que afectan a cada localidade.

Feijóo pon o foco sobre as festas universitarias e alerta da mala...
Comentarios