Unha persoa resultou ferida na madrugada do venres ao sábado tras caer por un terraplén ao tratar de esquivar dous cans en Outeiro de Rei. Foi o propio afectado quen alertou ao 112 Galicia do accidente.
Atendendo á información divulgada pola central, o sinistro ocorreu sobre as 2.45 horas da madrugada na estrada LU-111 á altura de Arcos. O vehículo caeu por un terraplén e bateu contra o muro dunha casa ao tratar de esquivar uns animais.
O condutor saíu do turismo a través do teito solar e solicitou asistencia sanitaria debido ao golpe. O 112 solicitou a intervención do 061 e da Garda Civil de Tráfico, ademais de avisar aos Bombeiros de Vilalba e ao servizo de mantemento da vía.