miércoles. 27.01.2021 |
El tiempo
miércoles. 27.01.2021
El tiempo

As fogueiras e as sardiñas son este ano para grupos reducidos

Foto de arquivo dunha cacharela da noite de San Xoán. DP
Foto de arquivo dunha cacharela da noite de San Xoán. DP
San Xoán preséntase fiel á súa cita pero só en parcelas privadas. Non chega a Lugo, onde non houbo peticións

Galicia celebra esta noite unha das súas festas con máis tradición: San Xoán, que non faltará á súa cita a pesar da pandemia aínda que chega en formato reducido. As limitacións ponas cada concello, pero case todos prohiben as fogueiras en espazos públicos, polo que saltar o lume sobre a area da praia terá que esperar outros 365 días. Si se poderá espantar as meigas en parcelas e xardíns privados, aínda que o mellor desexo este ano é escorrentar o virus aplicando un termo tan arraigado na comunidade como as cacharelas: o sentidiño. 

Por primeira vez en décadas Riazor e Orzán anoitecerán baleiros — a Policía desaloxaraos ás 21.00 horas—, xa que o Concello da Coruña veta o acceso aos areais. Así, o San Xoán herculino, declarado festexo de Interese Turístico Nacional, trasladarase aos barrios, onde non se poderán prender fogueiras pero si brasas para "sardiñadas, churrascadas e similares", de acordo co bando publicado pola alcaldesa Inés Rey, no que se esixe para iso unha "declaración responsable" co compromiso de manter "un aforamento limitado e seguir as recomendacións sanitarias". 

O mesmo sucede na maioría de municipios costeiros con tradición de cacharelas nas súas praias. Así, no Morrazo as celebracións limítanse a parcelas privadas e sempre con permiso previo.

Alén da ría —Vigo, Nigrán e Baiona— e en Santiago e Pontevedra ocorre outro tanto, que só haberá festas privadas, así como nas rías altas, onde Ferrol, Oleiros, Sada e Arteixo vetan tamén praias e calquera espazo público, como Carballo, outra dos berces do San Xoán galego. 

SEN FOGUEIRAS EN LUGO. Terra dentro a situación cambia. Desde os consistorios de Lugo e Ourense avanzan que permiten cacharelas privadas pero "non se presentou ningunha solicitude", polo que será o primeiro 23 de xuño en que non cheirará a sardiñas na Piringalla, Montirón ou As Gándaras, salvo que haxa lumes clandestinos.

As fogueiras e as sardiñas son este ano para grupos reducidos
Comentarios