domingo. 27.09.2020 |
El tiempo
domingo. 27.09.2020
El tiempo

Galicia realizará cribados cada quince días nas residencias de maiores

Residencia de Outeiro de Rei. SEBAS SENANDE
Residencia de Outeiro de Rei. SEBAS SENANDE
Hai 331 contaxiados nestes centros: 249 usuarios e 82 traballadores

O presidente da Xunta, Alberto Núñez Feijóo, anunciou este xoves que, segundo as recomendacións do Comité Clínico que asesora ao Goberno autonómico, realizaranse "cribados constantes", cada quince días, a persoas de residencias de maiores e persoas con discapacidade.

Tras a primeira reunión ordinaria do Goberno galego, Núñez Feijóo deu conta dos acordos adoptados na reunión que este órgano asesor celebrou este mércores, que entrarán en vigor a principios da semana próxima e que inclúen importantes novidades para os centros de maiores e persoas con discapacidade.

Así, en Galicia realizaranse cribados constantes ás "quince mil" persoas que traballan neste tipo de centros xa que o Comité entende que os problemas que están a xurdir en centros de maiores e de discapacidade están a darse entre os traballadores, posto que as persoas que permanecen internas teñen un contacto máis restrinxido co exterior.

Adicionalmente tamén cada dúas semanas realizarase un cribado "aleatorio" entre os usuarios das residencias co obxectivo de poder adiantarse a calquera posible brote. 

En Galicia hai dúas residencias intervidas por brotes importantes, as do Incio e Outeiro de Rei, ambas na provincia de Lugo. 

As residencias de maiores rexistran 331 contagios
As residencias de maiores de Galicia rexistran un total de 331 casos de covid-19 este xoves, dos que 249 son contagios de usuarios e 82, de traballadores, de acordo coa actualización das consellerías de Sanidade e Política Social, feita con datos de última hora do mércores. 

Nas últimas 24 horas coñeceuse un novo positivo no cadro de persoal da residencia do Incio, intervida pola Xunta. Deste xeito, os empregados contaxiados soben a strong<> 31, mentres que o número de usuarios con covid-19 neste centro é 77, un menos que este mércores tras o falecemento, comunicado o mércores, dun dos usuarios, ingresado no Hospital Lucus Augusti. 

Ademais, este xoves notificouse a curación de tres usuarios da residencia Orpea de Culleredo, na que quedan aínda 26 anciáns afectados, ademais de cinco empregados. 

O centro xeriátrico cun maior número de contaxios é a DomusVi Lugo, situada en Outeiro de Rei, onde as cifras se manteñen estables con respecto a este mércores: están contaxiados 142 usuarios e 24 traballadores. 

Ademais de en estes tres centros, hai maiores infectados co coronavirus tamén na residencia DomusVi de Lalín. Neste caso, seguen constando catro empregados afectados. 

No centro DoralResidencias de Mos figuran dous casos de empregados contaxiados, aos que se suman os casos individuais de traballadores doutras 16 residencias das catro provincias.

CENTROS DE ATENCIÓN Á DISCAPACIDADE. Pola súa banda, os centros de atención á discapacidade mantéñense sen cambios con respecto a este mércores. Hai 11 usuarios afectados na residencia Ricardo Baró de Aspronaga, en Oleiros. 

En canto ao persoal, hai cinco traballadores contaxiados: dous na Ricardó Baró, un na residencia de Aspace na Coruña, outro na da Braña na Estrada e un máis en Juan Vidán Torres, en Santiago de Compostela. 

Galicia realizará cribados cada quince días nas residencias de maiores
Comentarios