Galiciencia premia un proxecto impulsado por estudantes de Mondoñedo

Unha iniciativa de alumnos de Cangas levou o segundo premio

Dúas das alumnas que levaron o primeiro premio. EP
photo_camera Dúas das alumnas que levaron o primeiro premio. EP

Un proxecto para a recuperación da biodiversidade no rural desenvolvido por oito estudantes de Lugo converteuse no gañador absoluto da Galiciencia 2018, a maior feira científica de Galicia logo de ser o mellor valorado entre o medio centenar de proxectos que competían nesta edición.

A iniciativa Rebinxe, impulsada por alumnos do IES San Rosendo de Mondoñedo, busca "involucrar" aos habitantes dos Concellos de Mondoñedo, Abadín e Lourenzá na "mellora da situación dos ecosistemas rurais nesta comarca".

Para iso, estes estudantes realizaron nos últimos seis meses "estudos pormenorizados sobre tres especies autóctonas" que deu paso a varias actuacións que tiñan como obxectivo concienciar á poboación sobre a capacidade destas especies para controlar pragas como a velutina, colocación "a demanda" de caixas-refuxio e ferramentas en liña "para recompilar datos facilitados polos habitantes", o que lles permitiu estudar as condicións de vida de cada unha das especies.

O proxecto realizado por dous alumnos do centro Eduardo Pondal de Cangas do Morrazo obtivo, pola súa banda, o segundo premio mentres que o traballo elaborado por Esther Suárez e Lucía Suárez, das aulas científico-tecnolóxicas de Ponteceso, quedou en terceira posición.

En concreto, os alumnos de Cangas do Morrazo presentaron un foguete de combustible sólido a partir dunha "mestura de nitrato de potasio e azucre que provoca unha reacción de gases que impulsan o proxectil".

Dous alumnos do Eduardo Pondal de Cangas obtiveron o segundo premio por un foguete de combustible sólido

Para iso, Pablo Portela e Brais Pazó inspiráronse "nos principios físicos utilizados pola Nasa para fabricar sucesivos prototipos capaces de alcanzar cada vez maior altura e aceleración".

As estudantes das aulas tecnolóxicas de Ponteceso (A Coruña), Esther Suárez e Lucía Suárez, apostaron por unha estación meteorolóxica electrónica bautizada como "Cero lume" para a prevención de incendios.

O dispositivo, a partir de sensores de temperatura, humidade e velocidade do vento, "emite alertas cando se produce a combinación de factores de risco para poder controlar a situación".

Ademais, a feira científica entregou varias mencións especiais a varios proxectos relacionados coa presenza de plásticos nas praias e a reciclaxe de papel. O premio máis innovador recaeu nun sistema de axuda na reciclaxe de lixo para invidentes elaborado por alumnos das aulas do parque.

Para rematar, a fórmula para a grellada perfecta que permite "potenciar" o sabor do asado dos alumnos do Colexio San José-Josefinas de Ourense foi distinguida polo seu método científico e proceso de investigación mellor definido.

Comentarios