O goberno municipal de Vigo reiterou este xoves que a candidatura promovida pola Xunta para que Illas Atlánticas sexan declaradas Patrimonio da Humanidade "naceu morta" porque "non cumpre" os requisitos esixidos pola Unesco, e volveu a reclamar a Feijóo a "retirada inmediata" de dita iniciativa, concibida para "parar" a candidatura que impulsa o Concello (e que pide o recoñecemento só para as illas Cíes).
A concelleira socialista Yolanda Aguiar, que dirixe o proxecto Cíes-Patrimonio da Humanidade, sinalou, en declaracións aos medios, que o posicionamento da Xunta, mantendo a candidatura de todo o Parque Nacional, "non deixa lugar a dúbidas do ataque á cidade de Vigo".
Así, criticou que o goberno galego "perservera" nunha candidatura "morta", que "ninguén coñece" e que "xamais" alcanzará o seu obxectivo porque non conta con respaldo social, con consenso dos titulares dos bens afectados, e presenta outros problemas, como o "vertedoiro" de residuos a dúas millas da illa de Sálvora.
Yolanda Aguiar critica que o goberno galego "perservere" nunha candidatura "morta"
Por contra, defendeu a edila, Vigo leva traballando "duramente" no seu proxecto desde hai anos, reuniu a máis de 40 expertos científicos, economistas, e doutras áreas, e perfilou unha "candidatura gañadora".
Yolanda Aguiar, ademais, negou que Cíes non poida ser candidata de forma independente ao resto do Parque Nacional, e criticou que a delegada da Xunta, Corina Porro, utilice o seu cargo e, polo tanto, "diñeiro público", para "atacar Vigo". "Invito á señora Porro a que estude un pouco e lea as directrices da Unesco", afirmou, á vez que invitou á exalcaldesa a que "defenda os intereses" da cidade e "pida a Feijóo que retire a candidatura da Xunta".
LISTA INDICATIVA. Pola súa banda, o alcalde da cidade, Abel Caballero, reiterou a súa denuncia sobre o "engano masivo" de Feijóo ao resto de Comunidades Autónomas (representadas no Consello Nacional de Patrimonio Histórico) e ao Ministerio de Cultura, porque "ocultou" que a iniciativa do Executivo autonómico "non cumpre" os requisitos de Unesco.
Segundo o rexedor, estar na lista indicativa, como xa está a candidatura impulsada pola Xunta, "non ten ningún valor", porque é un mero "trámite administrativo", e "estará en lista indicativa eternamente". Por iso, Caballero volveu a pedir ao presidente galego "que a retire inmediatamente".
