Un home resultou ferido este martes tras chocar co seu automóbil contra outro turismo na estrada PO-340, que comunica os concellos de Gondomar e Tui.
Segundo informou o 112 Galicia, o accidente tivo lugar sobre as 17.00 horas, momento en que un particular alertou do sinistro, que se rexistrou na parroquia tudense de Randufe, e pediu asistencia sanitaria ante a posibilidade de que houbese persoas feridas e atrapadas, xa que un dos vehículos envorcara. Así mesmo, o ocupante dun dos vehículos implicados realizou unha chamada automática a través do sistema eCall, o que permitiu aos servizos de urxencia coñecer a localización exacta do sinistro.
O 112 Galicia avisou aos Bombeiros do Baixo Miño e ao GES da Guarda aínda que, xa no lugar, descartouse o uso do material de excarceración tras comprobar que o único ocupante do vehículo envorcado estaba liberado. Ademais, solicitouse a intervención de Urxencias Sanitarias de Galicia-061, dos axentes de Tráfico e da Policía Local e dos voluntarios de Protección Civil da localidade.
Finalmente, o ferido foi evacuado con lesións de diversas consideración ao Hospital Álvaro Cunqueiro.
Dado que o accidente deixou numerosos restos na vía, foi necesaria a participación do persoal de mantemento da Axencia Galega de Infraestruturas para recuperar as condicións de seguridade da calzada.
