Un home de 33 anos, veciño de Moraña, foi evacuado ao hospital de Pontevedra tras sufrir varias picaduras de avespas velutinas. Os feitos ocorreron este luns, ao redor das 12.30 horas, cando realizaba labores de roza co tractor nunha leira de Cosoirado.
Tras o ataque, o mozo botou a correr e chamou por teléfono a un amigo para avisar do acontecido. Cando chegou o amigo cuns familiares da vítima, esta estaba tombada no camiño inconsciente.
Segundo relatou o pai do mozo na TVG, as avespas picárono varias veces na cara, o pescozo, as costas e o abdome.
Ata o lugar desprazáronse efectivos da Policía Local, Protección Civil, unha ambulancia de Urxencias Sanitarias e un helicóptero que trasladou ao ferido ao Hospital Montecelo de Pontevedra.
