A Garda Civil interceptou na AP-9 un condutor que triplicaba a taxa máxima de alcol permitida grazas á colaboración cidadá.
Atendendo á información divulgada polo instituto armado, outro condutor comunicou ás 9.30 horas á Central Operativa de Tráfico que un turismo circulaba pola AC-11 cunha condución errática e que parara nunha gasolineira da Coruña, na zona de Elviña, a realizar compras con evidentes "síntomas" de estar baixo os efectos do alcol ou doutra sustancia. Esa persoa informou tamén de que o condutor emprendera a marcha e circulaba pola AP-9 en sentido Tui.
Tras alertar ás patrullas en servizo, unha localizou o vehículo e o condutor á altura do quilómetro 18 da AP-9 e, tras sometelo ás probas de alcol, arroxou un resultado positivo cunha taxa de 0,80 mg/l.
Instruíronse dilixencias por un delito contra a seguridade viaria, remitidas ao xulgado número dous de Betanzos, e o vehículo foi inmobilizado.
A Garda Civil eloxiou a colaboración cidadá como "un dos alicerces esenciais para o éxito da seguridade viaria". "Grazas a esa colaboración púidose intervir de forma rápida e eficaz para retirar da circulación un risco para todos", subliñou.