Axentes da Policía Autonómica de Ourense procederon a tomar declaración como investigado a un home pola presunta autoría dun incendio ocorrido o pasado 21 de febreiro na parroquia de Eiras, no concello de Laza (Ourense).
Segundo informa a Vicepresidencia da Xunta nun comunicado, o lume, que afectou a unha superficie arboredo de 1,2 hectáreas, orixinouse por unha fogueira mal apagada feita polo investigado.
Ao non levar a cabo as debidas medidas de precaución á hora de realizar o lume, isto fixo posible que alcanzase o monte que se atopaba ao seu lado. As dilixencias foron remitidas ao Xulgado de Instrución número 2 de Verín.
A Xunta de Galicia recorda que no que vai de ano, un total de catro persoas foron investigadas pola Policía Autonómica como presuntas autoras de incendios.
