sábado. 07.12.2019 |
El tiempo
sábado. 07.12.2019
El tiempo

Os investigados por incendios forestais no que vai de ano case alcanzan os de todo 2018

Lume forestal. EMERXENCIAS CUNTIS
Lume forestal. EMERXENCIAS CUNTIS
A Xunta avisa do despregamento de medios, consciente de que "cando se dan as condicións, hai un "efecto chamada" 

Un centenar de persoas foron investigadas ou detidas en Galicia no que vai de ano en relación con incendios forestais. O dato foi facilitado polo conselleiro de Medio Rural, José González, para reivindicar o "esforzo" no despregamento de medios humanos e tecnolóxicos para "disuadir" aos "incendiarios", posto que xa case alcanza a cifra global de 2018, cando foron 105 os imputados ou arrestados por estes feitos. 

González, en declaracións aos medios de comunicación coincidindo coa segunda reunión do comité de coordinación policial, destacou que a coordinación "está a funcionar", aínda que recoñeceu que "a meteoroloxía, non cabe ningunha dúbida, está a axudar" na comunidade galega, tras uns meses de xullo e agosto caracterizados por un tempo cambiante e sen temperaturas extremas nin ventos do nordés. 

Ante a previsión de que as condicións cambien a partir de agora, en calquera caso, o conselleiro asumiu que cando isto ocorre "hai un efecto chamada", de aí a mensaxe á cidadanía para que saiba que están dispostos "todos os medios para a disuasión", desde Policía Autonómica e Nacional, Exército, cámaras de videovixilancia e ata drons. 

Pola súa banda, a Delegación do Goberno –presente no comité de coordinación– emitiu un comunicado de prensa no que debulla por provincias e meses as detencións e investigacións que correron a cargo de Garda Civil e Policía Nacional. 

Nesta listaxe destacan Ourense con 19 e Lugo con 13 persoas, así como os meses de maio e marzo, con 12 e 11, respectivamente. A Pontevedra corresponderon sete investigados e á Coruña, un, mentres que en agosto van catro. 

O titular de Medio Rural, na súa intervención, resaltou o aumento de en torno ao 40% dos detidos e investigados por parte da policía adscrita á comunidade autonómica, e sinalou tamén o traballo en coordinación coas brigadas de investigación do servizo de loita contra incendio da Xunta. 

Logo dun 2017 que foi "momento de inflexión", pola vaga de lumes de outubro, o Goberno galego entende "que o período de máximo risco increméntase" e por iso é polo que as cuadrillas con contrato temporal estean operativas cinco meses, en lugar de tres, posto que "hai que traballar máis en extinción e en prevención".

MÁS DE 1.300 LEIRAS LIMPAS. Precisamente sobre esta última, cifrou en máis de 1.300 as leiras que xa van limpar as súas franxas de seguridade en parroquias priorizadas, tras a firma de contratos ao amparo do convenio entre Medio Rural, Fegamp e Seaga. 

O titular de Medio Rural indicou que "moita da xente que ten que asinar só vén nestes meses de verán ao pobo", de aí o atraso nos labores, e explicou que aínda que se roce no verán farase "con todas as precaucións" por se salta "algunha faísca ou tal". 

Para rematar, a este respecto, ratificou que no que queda de exercicio completarase a limpeza das 4.500 hectáreas das parroquias priorizadas, e insistiu na petición de que os particulares "asinen os contratos, porque lles sae máis barato que o faga Seaga a que o fagan polos seus medios".

INICIO DE NOTIFICACIÓNS. De todos os xeitos, avanzou que "nestes días" a consellería iniciará tamén "as notificacións para aqueles que non asinaron os contratos", coa intención de advertirlles "de que haberá que entrar" nas súas leiras e de que lles será cobrado "o seu custo". 

"Non é o obxectivo, non queremos cobrar de máis nin sancionar, pero si queremos que as franxas desas parroquias estean limpas porque buscamos protexer á xente das aldeas dos incendios", resolveu. 

Os investigados por incendios forestais no que vai de ano case...