A titular do Xulgado de Instrución Número 1 de Lugo, Pilar de Lara, reactivou as dilixencias dentro da operación Pokemon con novas declaracións no marco da peza que investiga a existencia de supostos subornos a políticos no proceso de contratación do servizo de guindastre municipal da capital lucense á empresa Cechalva.
Fontes xurídicas informaron a Efe de que foron citados para prestar declaración este xoves, a partir das 17:30 horas, o que fose concelleiro de Obras do Concello de Lugo José Piñeiro e o que fora responsable municipal de Economía e Urbanismo –tamén expresidente da Confederación Hidrográfica Miño-Sil–, Francisco Fernández Liñares.
Xunto a eles, foron citados tamén para comparecer ante a xuíza varios funcionarios municipais e un empresario lucense, propietario dunha empresa de construción centrada no ámbito das obras públicas e socio de Cechalva.
As mesmas fontes indicaron que todos eles foron citados para prestar declaración en relación cos supostos agasallos recibidos polos políticos municipais a cambio de favores.
