A incógnita sobre a celebración das oposicións de profesorado en Galicia suscitou críticas de decenas de persoas, que están a aproveitar os medios dixitais para pedir que se acabe coa incerteza. Así, máis de 5.000 persoas subscribiron xa unha petición online a través de Change.org para pedir que os procesos selectivos se aprecen ata o próximo ano ante a "situación crítica que se está vivindo" e "con todas as consecuencias" que está ocasionando.
"Parécenos que o máis ético sería aprazar as oposicións para o curso que vén. Ademais, consideramos que se se está facendo un chamamento á cidadanía para que quede en casa e asuma a responsabilidade de deter o seu día a día, seguir co proceso normal de oposicións é incoherente", indica o texto da iniciativa.
Por "solidariedade" con todos, os asinantes piden á Xunta que se apracen as oposicións "como fixeron noutras comunidades". "Estes momentos son moi duros como para seguir estudando coma se nada pasase".
Do mesmo xeito, algunhas persoas visibilizaron o seu malestar nas redes sociais a través do hashtag #OPOñomeaestaOPO.
Os sindicatos de profesorado esixiron a convocatoria "urxente e inmediata" da mesa sectorial de educación para abordar a data concreta das oposicións docentes. CIG-Ensino, CC.OO. Ensino, ANPE e FeSP-UXT emitiron un comunicado e unha solicitude conxunta para que se convoque ese órgano de negociación, coa presenza da conselleira, Carmen Pomar.
O Goberno galego aposta por manter o proceso mentres os prazos o permitan, á espera da evolución da situación sanitaria polo Covid-19 no territorio. Polo menos, ata unha data próxima ao 26 de abril, para a que Educación confía en tomar unha decisión definitiva.
