A alcaldesa de Mos, Nidia Arévalo (PP), xustificou a convocatoria dunha concentración este venres para reclamar ao Goberno o reinicio das obras na autovía A-55, que levan dous anos paradas, en que "non podemos esperar máis".
Arévalo, apoiada polos portavoces de todos os grupos da corporación, así como por representantes de asociacións e veciños, protestou polas sucesivas promesas incumpridas por parte da Dirección Xeral de Estradas de reiniciar as obras na que definiu como a autovía máis perigosa de España.
Revelou que a última data que lle deron chegoulle a través dun correo electrónico desde a Subdelegación do Goberno que apuntaba ao próximo mes de maio, pero "non me vale", aseverou.
Arévalo, que recoñeceu que a convocatoria da concentración do venres "non é un paso fácil" para ela, incidiu en que Mos necesita "unha data" concreta e "o inicio das obras xa".
Fixo fincapé en que o estado actual da A-55, con varios tramos coa velocidade reducida a sesenta quilómetros por hora e cos accesos ás parroquias con conectan coa mesma sen iluminación nin sinalización, afectan a miles de veciños de toda a área metropolitana de Vigo que transitan por ela a diario.
Pero ademais diso están os "problemas de contaminación, ruído e fume" que padecen os veciños de Mos, municipio que atravesa esta autovía pola metade. Os portavoces de BNG, Gañamos e PSOE coincidiron en sinalar que máis aló das cores políticas apoian a posición do Goberno local nesta reivindicación.
